ՀՀ-ում կայանալիք ԵԱՏՄ բարձրագույն տնտեսական խորհրդի նիստի շրջանակում ակնկալում ենք Պուտինի այցը Երևան. ՀՀ-ում ՌԴ դեսպան

ՀՀ-ում տեղի ունեցած ներքաղաքական իրադարձություններից հետո հայ-ռուսական հարաբերությունները կայուն կերպով զարգանում են, գտնվում բարձր մակարդակի վրա և կրում դաշնակցային ու ռազմավարական գործընկերության բնույթ: Այս մասին լրագրողների հետ հանդիպման ժամանակ ասաց ՀՀ-ում ՌԴ դեսպան Սերգեյ Կոպիրկինը: 

«Միաժամանակ, բնականաբար, այդ հարաբերությունները զարգանում են և հարմարեցվում նոր իրողություններին, խնդիրներին ու պահանջներին»,- ընդգծեց դեսպանը՝ հիշեցնելով ՀՀ և Ռի ղեկավարների պարբերական հանդիպումների մասին, որոնցից վերջինը տեղի էր  հունիսի 6-ին Սանկտ Պետերբուրգում: 

Նա հավելեց, որ երկու երկրների ղեկավարները պարբերաբար շփվում են նաև ինտեգրացիոն միությունների շրջանակում իրականացվող միջոցառումների համատեքստում՝ հեռախոսազրույցների ընթացքում: 

«Ռուսաստանում մեծապես կարևորեցին տարեսկզբին ՀՀ վարչապետ Նիկոլ Փաշինյանի այցը Մոսկվա, որի ընթացքում  ներկայացվեցին Հայաստանի ԵԱՏՄ նախագահության առաջնահերթությունները», - շեշտեց դեսպանը: 

Կոպիրկինը նշեց,  որ այս տարի հոկտեմբերին Հայաստանում տեղի կունենա ԵԱՏՄ բարձրագույն տնտեսական խորհրդի նիստը, որին կմասնակցեն ԵԱՏՄ անդամ երկրների ղեկավարները: «Մենք, բնականաբար, այդ առիթով ակնկալում ենք  ՌԴ նախագահի այցը Երևան», - ասաց նա: