Երևանում ավարտվել է միջազգային PLAS Ֆորում FinnoWay Armenia 2025-ը

Ավելի քան 200 մասնակից, 130 բանախոս աշխարհի ավելի քան 30 երկրից։ Երևանում ավարտվել է միջազգային PLAS Ֆորում FinnoWay Armenia 2025-ը։

Երկու օր շարունակ «Մերիդիան» ցուցահանդեսների սրահը վերածվել էր մեր տարածաշրջանի ֆինանսական կարևորագույն զարգացումների հիմնական կենտրոնի։ Ֆորումի կազմակերպիչն էր PLUS Group ընկերությունը, համակազմակերպիչը՝ Armenian Card ազգային վճարային համակարգը։ FinnoWay Armenia 2025-ն անցկացվեց Հայաստանի Կենտրոնական բանկի աջակցությամբ։

Ֆորումը միավորեց պետական մարմինների և կարգավորող կառույցների ներկայացուցիչների, բանկերի և ֆինտեք ընկերությունների ղեկավարների, ՏՏ պարկերի և աքսելերատորներին, ֆոնդային բորսաների, վենչուրային և ներդրումային կառույցների, հեռահաղորդակցման և ՏՏ օպերատորների, մանրածախ առևտրի և էլեկտրոնային առևտրի ոլորտների մասնագետների։

Ֆորումի ծրագիրն ընդգրկում էր մի շարք առանցքային ուղղություններ՝ բանկային համակարգի թվային վերափոխում, ազգային վճարային գործիքների զարգացում, կիբերանվտանգության նորարար լուծումներ և ֆինտեք լուծումների ինտեգրում պետական կառավարման համակարգում։ Առանձին քննարկումներ նվիրված էին ֆինտեքի և պետական կառավարման ինտեգրման հեռանկարներին (ներառյալ պետական ծառայությունների թվային հարթակները և RegTech գործիքները), վճարային համակարգերի անվտանգությանն ու կիբերսպառնալիքներին դիմակայելու ուղիներին, վստահելի թվային միջավայրի ձևավորմանը, ստարտափ էկոհամակարգերի զարգացմանը և վենչուրային ներդրումների ներգրավմանը, էլեկտրոնային առևտրի և թվային ռիթեյլի ապագային, ինչպես նաև արհեստական բանականության և մեծ տվյալների կիրառմանը՝ ֆինանսական հաստատությունների ու կորպորատիվ կառավարման արդյունավետությունը բարձրացնելու նպատակով։

Կազմակերպիչները՝ PLUS Group-ի ներկայացուցիչները կարևորում են հենց Հայաստանում նման ֆորում անցկացնելու փաստը։ Այստեղ նրանք մեծ հնարավորություններ են տեսնում։

Միջազգային PLUS Ֆորում FinnoWay Armenia 2025-ի անցկացմանն աջակցել է ՀՀ կենտրոնական բանկը։ Բանկի նախագահ Մարտին Գալստյանը տեսաուղերձով ողջունել է քննարկումների մասնակիցներին, մաղթել նրանց արդյունավետ աշխատանք։ Հայկական կողմի ակնկալիքները լրագրողներին է ներկայացրել Կենտրոնական բանկի նախագահի տեղակալ Հովհաննես Խաչատրյանը։

PLUS Group ընկերությունը միջազգային PLUS-Ֆորումներ է կազմակերպում 2009 թվականից։ ԵԱՏՄ երկրների համար առաջին ֆորումը տեղի է ունեցել 2019 թվականին։ 2021 թվականից ընկերությունը սկսել է ակտիվորեն PLUS-Ֆորումներ կազմակերպել  նաև Կենտրոնական Ասիայի երկրների համար։

Երևանում երկու օր տևած քննարկումների ընթացքում բանախոսները խոսել են ոլորտի կարևոր զարգացումների, մարտահրավերների և նոր հնարավորությունների մասին։ Ֆորումն աչքի է ընկել նաև յուրահատուկ ներկայացումներով։ Այսպես այսօր՝ նոյեմբերի 12-ին, FinnoWay Armenia-ի շրջանակներում պատմության մեջ առաջին անգամ ներկայացվել է Diella-ն՝ աշխարհում առաջին արհեստական բանականության նախարարը, որը մշակվել է Ալբանիայի Տեղեկատվական հասարակության ազգային գործակալության (AKSHI) կողմից։

Ֆորումի ավարտին եղել է նաև խաղարկություն ու մրցանակաբաշխություն։

Միջազգային PLAS ֆորումը Հարավային Կովկասում անց էր կացվում առաջին անգամ։ Սակայն թե՛ կազմակերպիչները, թե՛ ֆորումի մասնակիցները խոսում են այն շարունակական դարձնելու անհրաժեշտության մասին։