Այս խորհդանշական վայրում վերհաստատում ենք մեր ուխտը՝ պաշտպանելու մեր անկախությունն ու ինքնությունը․ Իշխան Սաղաթելյան

«Ասել եմ և շարունակում եմ պնդել ,որ Հայաստանի անկախության և ինքնիշխանության հիմնական սպառնալիքներից մեկը՝  անձամբ  Նիկոլ Փաշինյանն է, հետևաբար,  նրա հեռացումը կամ վերատադրության կանխումն ազգային անվտանգության հարց է»,- Սեպտեմբերի 21-ին՝ Հայաստանի Հանրապետության Անկախության օրը, ՀՅԴ  երիտասարդական  և ուսանողական միությունների տոնական երթի ժամանակ իր ելույթում նշեց ՀՅԴ Հայաստանի ԳՄ ներկայացուցիչ, ԱԺ «Հայաստան» խմբակցության պատգամավոր Իշխան Սաղաթելյանը։

«Անկախությունը միայն փաստաթուղթ չէ․ այն առաքելություն է։ Հայաստանը փոքր է տարածքով, բայց մեծ է առաքելությամբ։Հայաստան միայն ՀՀ քաղաքացիների հայրենիքը չէ , այլ ողջ հայ ժողովրդին է: Հայկական Սփյուռքը մեր համաշխարհային հենարանն է։

Պատերազմը, պարտությունը, անգամ, Ցեղասպանությունը դատավճիռ չեն հանձնվելու համար , եթե պատրաստ ես պայքարել։ Մեր հավատքը, եկեղեցին, պատմամշակութային ժառանգությունը,մեր հիշողությունը կամ բիբլիական Արարատը ոչ թե սպառնալիք են, այլ արժանապատիվ ապագայի միակ երաշխիքը։ Հայաստանը պետք է լինի ոչ թե իրականության հետ հաշտվող, այլ իրականություն ստեղծող պետություն»,-նշեց Իշխան Սաղաթելյանը՝ խոսքն ամփոփելով հետևյալով․ «Այսօր մենք ոչ միայն տոնում ենք մեր անկախության օրը, այլև այս խորհդանշական վայրում, առաջին հանրապետության հիմնադիր  Արամ Մանուկյանի հուշարձանի մոտ վերհաստատում ենք մեր ուխտը  ՝ պաշտպանելու մեր անկախությունն ու  ինքնությունը, վերհաստատում ենք մեր կամքը անկախ,ինքնիշխան ,ժողովրդավարական և իրավական պետություն կերտելու: Արամ Մանուկյանը և մեր նախնիները  մեզ պարտավորեցնում է լինել ուժեղ, համարձակ և աննահանջ պայքարել համազգային նպատակների  համար»։