Թեհրանում ապրող ասորիները լքում են իրենց տներն ու ունեցվածքը՝ տեղափոխվելով երկրի ծայրամասեր

Պատմաբան Անահիտ Խոսրոևան գրում է․

«Իսրայել-Իրան շարունակվող հակամարտության երկկողմ հարձակումները ուղիղ և անուղղակի ազդեցություն են թողնում պատերազմող երկու երկրների ասորական համայնքների վրա, ովքեր տարածաշրջանի ամենահին քրիստոնյա ժողովուրդն են: Օրեր շարունակվող հարձակումները ստեղծել են վախի, անորոշության և անկայունության մթնոլորտ։ Ասորիների նման փոքրամասնությունների համար, ովքեր առանց այդ էլ ապրում են սահմանափակ պաշտպանությամբ և համակարգային մարգինալիզացիայով, ներկայիս կյանքը դարձել է էլ առավել վտանգավոր ու խոցելի։

Թեհրանում ապրող ասորիներն արդեն լքում են իրենց տներն ու ունեցվածքը՝ տեղափոխվելով երկրի ծայրամասեր, հիմնականում Ուրմիայի շրջան: Այստեղ խնդիրը միայն անհատի անվտանգությունը չէ, այլ մի ամբողջ ժողովրդի գոյատևման հարցը, ով հազարամյակներ շարունակ ապրել է այս տարածաշրջանում։

Ցավոք, պատմությունը կրկնվում է, և հերթական անգամ ոչ ի օգուտ մեր ժողովուրդների»: