Խաղաղության պայմանագրի հարցում գնդակը Հայաստանի դաշտում է․ Ալիև

«Ես արդեն բազմիցս հրապարակայնորեն հայտարարել եմ, թե ինչ ենք մենք ակնկալում Հայաստանից մեր տարածքային ամբողջականության և նրանց Սահմանադրության առումով»,- ադրբեջանական լրատվամիջոցների հաղորդմամբ, ասել է Ադրբեջանի նախագահ Իլհամ Ալիևը։

Նա նշել է, երբ դա արվի, և խաղաղության համաձայնագիրը ստորագրվի, այն ժամանակ Հարավային Կովկասի համար որևէ խոչընդոտ չի լինի՝ փորձելով դառնալ ինտեգրված տարածաշրջան։

«Կարծում եմ, որ սա կարող է շահեկան իրավիճակ լինել հարավկովկասյան երեք երկրների համար։ Իրատես լինելով, իհարկե, չենք կարող պատկերացնել, որ անմիջապես կընկերանանք Հայաստանի հետ։

Սա անիրատեսական է, և նույնիսկ ինչ-որ տնտեսական ինտեգրացիայի մասին խոսելը վաղաժամ է։ Բայց մենք պատրաստ ենք փոքր քայլեր սկսել՝ վստահություն ստեղծելու համար»,- ասել է նա՝ ընդգծելով, որ վերջին շրջանում որոշակի նախաձեռնություններ են եղել, և իրենք կսպասենք հայկական կողմի դիրքորոշմանը։

Ալիևը նաև ասել է. «Եթե ​​Ադրբեջանի և  Հայաստանի միջև համաձայնագիր ստորագրվի, ապա, իհարկե, համագործակցություն սկսելու համար որևէ խոչընդոտ չի լինի։

Կարծում եմ, որ չպետք է ժամանակ կորցնենք, քանի որ, կրկին, խաղաղության պայմանագրի հարցում գնդակը Հայաստանի դաշտում է։ Ես բազմիցս հրապարակայնորեն հայտարարել եմ, թե ինչ ենք մենք ակնկալում Հայաստանից մեր տարածքային ամբողջականության և իրենց սահմանադրության առումով»։