Ուկրաինան անօդաչու թռչող սարքերով հարձակում է գործել Մոսկվայի վրա

ՀՕՊ ուժերը խոցել են մոտ 70 անօդաչու, որոնք թռչում էին դեպի Մոսկվա, հայտարարել է Մոսկվայի քաղաքապետ Սերգեյ Սոբյանինը։

«ՊՆ ՀՕՊ ուժերը ներկա պահին թշնամական 69 անօդաչու են խոցել, որոնք թռչում էին Մոսկվայի վրա», - Telegram-ի իր ալիքում հայտնել է Սոբյանինը։

Հաղորդվում է, որ կան վնասված տներ և մեքենաներ։

Անօդաչուներից մեկը մխրճվել է Ռամենսկոյեի բազմահարկ շենքերից մեկի մեջ։ Վերջին հարկի բնակարանում հրդեհ է բռնկվել։ Դրանից բացի, մի քանի բազմահարկ շենք է վնասվել Վիդնոյեում։

Անօդաչուներից մեկն էլ մտել է Վիսոկիյ Բերեգ քոթեջային ավանի մասնավոր տներից մեկի մեջ, ևս մեկը` վնասել Մոսկվայի Դոմոդեդովսկայա փողոցի բազմահարկ շենքը։

Բացի այդ, անօդաչուի բեկորներն ընկել են Դոմոդեդովոյի երկաթուղային կայարանի շրջանում` վնասելով գծի մի մասը։

Դոմոդեդովոյի ղեկավար Եվգենյա Խրուստալյովայի խոսքով` ուկրաինական անօդաչուների գրոհի պատճառով սահմանափակվել է Դոմոդեդովո կայարանից գնացքների երթևեկությունը դեպի Մոսկվա և Մոսկվայի մարզ։

Նա նշել է, անօդաչուհի հարձակման հետևանքով հրդեհ է բռնկվել Դոմոդեդովոյի քաղաքային շրջանի «Միրատորգի» կայանատեղիում։