Աբխազիայում արտահերթ նախագահական ընտրությունների երկրորդ փուլ են անցել Բադրա Գունբան և Ադգուր Արձինբան

Աբխազիայում արտահերթ նախագահական ընտրությունների երկրորդ փուլ է լինելու, որին կմասնակցեն քաղաքական գործիչ Բադրա Գունբան և ընդդիմադիր Ադգուր Արձինբան, հայտարարել է հանրապետության Կենտրոնական ընտրական հանձնաժողովի նախագահ Դմիտրի Մարշանը, տեղեկացնում է РИА Новости-ն։

«Ամեն դեպքում, կլինի երկրորդ փուլ, որին կմասնակցեն Գունբա Բադրա Զուրաբովիչը և Արձինբա Ադգուր Ամիրանովիչը»,- լրագրողներին ասել է նա։

Մարշանը հավելել է, որ նախնական արդյունքները կհրապարակվեն կիրակի կեսօրին։

Պետության ղեկավարի պաշտոնին հավակնում է հինգ հոգի՝ հայտնի աբխազ քաղաքական գործիչ Բադրա Գունբան, Ռուսաստանում առևտրային նախկին ներկայացուցիչ Օլեգ Բարցիցը, հանրապետության Վերահսկիչ պալատի նախկին ղեկավար Ռոբերտ Արշբան, ընդդիմադիր Ադգուր Արձինբան և Սևծովյան զարգացման բանկի նախագահ Ադգուր Խուրխումալը։

Կենտրոնական ընտրական հանձնաժողովի տվյալներով, քվեարկությունն անցկացնելու համար 152 ընտրատեղամաս է ստեղծվել հենց Աբխազիայում և ևս երկուսը Ռուսաստանում՝ Մոսկվայում և Չերքեսկում։ Ընտրողների հիմնական ցուցակում ընդգրկված է 134 հազար մարդ։

Աբխազիայի նախկին նախագահ Ասլան Բժանիան հրաժարական էր տվել նոյեմբերի 19-ին Սուխումում ընդդիմության քառօրյա ցույցերից հետո։