Կոբախիձեն Ղավելաշվիլիին անվանել է 20 տարվա մեջ Վրաստանի առաջին հոգեպես հավասարակշռված նախագահը

Վրաստանի վարչապետ Իրակլի Կոբախիձեն Միխեիլ Ղավելաշվիլիին անվանել է երկրի առաջին հոգեպես և հոգեբանորեն հավասարակշռված նախագահը վերջին 20 տարում։

«Ավելի քան 20 տարի Վրաստանը չունի հայրենասեր, հոգեպես և հոգեբանորեն հավասարակշռված նախագահ։ Այս առումով Միխեիլ Ղավելաշվիլիի նախագահությունը բեկումնային կլինի մեր երկրի համար», - ասել է Կոբախիձեն։

Վարչապետի խոսքով՝ վերջին երկու տասնամյակների ընթացքում «թշնամական արտաքին ուժերն» օգտագործել են նախագահական ինստիտուտը՝ հասարակությունը պառակտելու և երկրի «սահմանադրական կարգը արհեստականորեն թուլացնելու համար»։

Կոբախիձեն վստահ է, որ Ղավելաշվիլիի ընտրությամբ «ինստիտուտն արժանիորեն կվերադառնա իր սահմանադրական առաքելությանը», և այն «զգալի ներդրում կունենա վրացական պետականության և ինքնիշխանության ամրապնդման գործում» և կնպաստի «արմատականության և բևեռացման նվազեցմանը»:

Ավելի վաղ հայտնել էինք, որ Վրաստանի վեցերորդ նախագահ է ընտրվել Միխեիլ Ղավելաշվիլին։