Վրաստանի խորհրդարանն ընդունել է նոր գումարման պատգամավորների լիազորությունները

Վրաստանի խորհրդարանը ձայների մեծամասնությամբ ընդունել է 11-րդ գումարման պատգամավորների լիազորությունները, կառավարությունը հրաժարական է տվել, հայտնում է РИА Новости-ի թղթակիցը։

Հանրապետության սահմանադրության համաձայն՝ նոր խորհրդարանի աշխատանքները սկսելուց անմիջապես հետո կառավարությունը պետք է հրաժարական տա։

Հոկտեմբերի 26-ին կայացած ընտրություններում հաղթած իշխող «Վրացական երազանք» կուսակցությունը վարչապետի թեկնածու է առաջադրել կառավարության ներկայիս ղեկավար Իրակլի Կոբախիձեին։ Նա իր հերթին ներկայացրել է կառավարության նորացված կազմը՝ արտաքին գործերի, արդարադատության և շրջակա միջավայրի նախարարությունների ղեկավարների երեք նոր թեկնածուներով։

Հիշեցնենք` Վրաստանի ԿԸՀ-ն նոյեմբերի 16-ին հրապարակեց հոկտեմբերի 26-ին կայացած խորհրդարանական ընտրությունների ամփոփիչ արձանագրությունը, որի համաձայն` հաղթել է իշխող «Վրացական երազանք» կուսակցությունը՝ հավաքելով ձայների 53,93 տոկոսը և խորհրդարանում ստանալով 150 մանդատներից 89-ը: Խորհրդարան են անցել նաև չորս ընդդիմադիր կուսակցություններ, բայց նրանք չեն ընդունում ընտրությունների արդյունքները ևհրաժարվում են պատգամավորական տեղերից: