Ե՞րբ եք ընդունելու, որ ձեր օրոք մեր երեխաների առողջությանը տրվել է ամենօրյա հարված. ՀՅԴ Երևանի Քաղաքային կոմիտեի հայտարարությունը

ՀՅԴ Երևանի Քաղաքային կոմիտեն հայտարարություն է տարածել, որը ներկայացնում ենք ստորև.

«Երևանի քաղաքապետ Տիգրան Ավինյանն 2024 թ. նոյեմբերի 18֊ին, գործակարգավարական հերթական խորհրդակցության ժամանակ հայտարարել է, որ այլևս չի հանդուրժելու անորակ սննդի մատակարարումը Երևանի մանկապարտեզներին։

Սա նշանակո՞ւմ է արդյոք, որ Երևան քաղաքի ղեկավարությունը չիրականացված խոստումներով վերցրած ՔՊ-ական իրար հաջորդած քաղաքապետերը, վեց տարուց ավելի հանդուրժել են, որ մեր երեխաներին մատակարարվի անորակ սնունդ:

Հարցը, որ ծագում է այսօր եւ ուղղված է մախինացիաներով քաղաքապետի աթոռին հասած Ավինյանին.- Վատ ճանապարհներ ունենալը վնասում է ավտոմեքենաները, խփում է երևանցիների գրպանին: Սակայն երեխաներին վատորակ սնունդ մատակարելն ուղիղ վնասում է մեր ապագա սերնդի առողջությունը: Ե՞րբ եք նվազագույն քաջություն ունենալու ընդունել, որ տապալել եք ամեն ինչ, ու ձեր օրոք, մեր երեխաների առողջությանը տրվել է ամենօրյա հարված»: