Նեպալում ջրհեղեղների և սողանքների հետևանքով զոհերի թիվը հասել է առնվազն 100-ի

Նեպալում ջրհեղեղների և սողանքների հետևանքով զոհերի թիվը հասել է առնվազն 100-ի, տասնյակ մարդիկ անհայտ կորած են համարվում, հայտնում է Associated Press-ը։

Ոստիկանությունը կիրակի առավոտյան զգուշացրել է, որ զոհերի թիվը կարող է աճել լեռնային երկրի գյուղերից ստացվող տեղեկություններից հետո: Կիրակի օրը Նեպալում եղանակը բարելավվել է, և սկսվել են փրկարարական, վերականգնման և մաքրման աշխատանքները:

Գիշերը փրկարարները 14 դի են հայտնաբերել մայրաքաղաք Կատմանդու մեկնող երկու ավտոբուսում, որոնք սողանքի հետևանքով թաղված են եղել մայրաքաղաքի մերձակայքի մայրուղու վրա: Առնվազն ևս մեկ ավտոբուս և այլ տրանսպորտային միջոցներ դեռ թաղված են մնում նույն վայրում, իսկ փրկարարները մաքրում են քարերն ու ցեխը՝ փորձելով գտնել մարդկանց:

Կիրակի օրը Կատմանդուն դեռ հոսանքազրկված է մնում, քանի որ քաղաքից դուրս գտնվող հիմնական մայրուղիները արգելափակվել են սողանքների պատճառով: Երեք մայրուղի, ներառյալ առանցքային Պրիտխվի մայրուղին, որը կապում է Կատմանդուն երկրի մնացած մասերին, արգելափակված են սողանքների պատճառով:

Առնվազն 34 մարդ է զոհվել միայն Կատմանդուում, որն ամենից շատ է տուժել  շաբաթ օրը տեղի ունեցած ջրհեղեղից։

Կառավարությունը հայտարարել է, որ առաջիկա երեք օրվա ընթացքում փակում է դպրոցներն ու քոլեջներն ամբողջ Նեպալում։

Ուրբաթ օրը սկսված հորդառատ անձրևը դադարել է շաբաթ գիշերը, սակայն սպասվում է, որ այն կշարունակվի մինչև հանգստյան օրերը: Անցյալ շաբաթ կառավարությունը նախազգուշացրել էր ողջ երկրում հեղեղումների մասին:

Ավտոբուսներին արգելվում է գիշերային ժամերին մայրուղով երթևեկելը, իսկ մարդկանց խորհուրդ է տրվում խուսափել ավտոմեքենա վարելուց: Մուսոնների սեզոնը սկսվել է հունիսին և սովորաբար ավարտվում է սեպտեմբերի կեսերին: