Չինաստանում սողանքների հետևանքով զոհերի թիվը հասել է 38-ի. ՄԱԿ-ը պատրաստակամություն է հայտել աջակցելու որոնողական աշխատանքներին

Չինաստանի հարավարևմտյան Գույչժոու նահանգում սողանքների հետևանքով զոհերի թիվը հասել է 38-ի, ևս 13 մարդ անհայտ կորած է համարվում. հայտնում է  Չինաստանի Կենտրոնական հեռուստաընկերությունը:

Ավելի վաղ հաղորդվել էր 26 զոհի և 25 անհայտ կորածի մասին:

Սողանքները տեղի են ունեցել անցյալ շաբաթ՝ վնաս հասցնելով ավելի քան 23 տնտեսության, 20 շինության՝ ներառյալ բնակելի տների, որոնք ամբողջությամբ գետնի տակ են անցել:

Անհայտ կորած անձանց որոնողական աշխատանքները շարունակվում են: Միջոցառումներին, հրշեջ-փրկարարներից զատ, մասնակցում են նաև զինվորականներ, ոստիկաններ և կամավորներ: ՄԱԿ-ն, անհրաժեշտության դեպքում, Չինաստանին որոնողափրկարարական գործողություններում աջակցություն ցուցաբերելու պատրաստակամություն է հայտնել:

«Գլխավոր քարտուղարը ողջունում է Չինաստանի կառավարության կողմից իրականացվող որոնողափրկարարական գործողությունները: Անհրաժեշտության դեպքում ՄԱԿ-ը պատրաստ է աջակցել այդ ջանքերին»,- ասվում է կազմակերպության գլխավոր քարտուղարի պաշտոնական ներկայացուցչի տեղակալ Ֆարհան Հաքի հայտարարությունում: