Ագրարային համալսարանի ռեկտորատը ձևավորված է կանոնադրական կոպիտ խախտումներով

Ագրարային համալսարանում ավանդույթ է դարձել կանոնադրության և այլ իրավական ակտերի խախտմամբ գործունեություն ծավալելը:

Օրերս Yerkir.am-ը անդրադարձել էր համալսարանի ուսանողական խորհրդին, որը չկատարելով «Կրթության մասին» ՀՀ օրենքի 28-րդ հոդվածի պահանջը, գործունեություն է ծավալում օրենքից դուրս:

Այսօր կանդրադառնանք համալսարանի ռեկտորատին: Համալսարանի կանոնադրության 43-րդ հոդվածը սահմանում է, որ ռեկտորատի կազմում ընդգրկվում են ռեկտորը, պրոռեկտորները, ռեկտորատի քարտուղարը, ուսումնական վարչության պետը, գլխավոր հաշվապահը, մասնաճյուղերի, գիտահետազոտական ինստիտուտների, կենտրոնների տնօրենները, ֆակուլտետների դեկանները:

Ներկայացնենք այն պաշտոնատար անձանց, որոնք համալսարանի կանոնադրության համաձայն իրավունք չունեին, սակայն ներառված են ռեկտորատի կազմում՝

1. Լուսինե Մնացականյան – աշխատակազմի ղեկավար

2. Մանվել Վարդանյան – իրավաբանական բաժնի պետ

3. Աննա Աղաջանյան - Արհեստակցական կազմակերպության նախագահ

4. Արթուր Գրիգորյան - Ագրոբիզնեսի դեպարտամենտի պետ

5. Թոռնիկ Ալիյան - ուսանողական խորհրդի նախագահ

6. Վարդան Վարդանյան - ՀԱԱՀ Ա․Քոչինյանի անվան գյուղատնտեսական քոլեջի տնօրենի պաշտոնակատար

Հաջորդիվ ներկայացնենք այն ստորաբաժանումները, որոնց ղեկավարները կանոնադրության համաձայն պետք է լինեին ռեկտորատի կազմում, սակայն ընդգրկված չեն՝

1. Գյուղատնտեսության մեքենայացման և ավտոմատացման գիտահետազոտական ինստիտուտ

2. Սննդագիտության և կենսատեխնոլոգիաների գիտահետազոտական ինստիտուտ

3. Գյուղատնտեսական կենդանիների սելեկցիայի, գենետիկայի և կերակրման կենտրոն

4. Անասնաբուժության և անասնաբուժական սանիտարական փորձաքննության կենտրոն

5. Ագրարային քաղաքակնության և տնտեսագիտության կենտրոն

6. Լեզվի ուսուցման կենտրոն

7. Ճշգրիտ գյուղատնտեսության կենտրոն

8. Ակունք օրգանական գյուղատնտեսության ուսումնափորձնական կենտրոն

Կարծում ենք, որ ԿԳՄՍ նախարարությանը և հոգաբարձուների խորհրդին պետք է, որ հետաքրքրի տարիներ շարունակ կանոնադրական կոպիտ խախտումներով գործող ռեկտորատի և դրա ընդունած որոշումների լեգիտիմության հարցը:

Հ. Գ. Բարեկամական մեկ խորհուրդ էլ ռեկտորի պարտականությունները կատարող Հ. Զաքոյանին: 2021թ. հուլիսի 22-ին գիտական խորհրդի կողմից ընդունված և նախկին ռեկտոր Վ. Ուռուտյանի կողմից վավերացված Ռեկտորատի կանոնակարգը հակասում է կանոնադրությանը: