Բնակիչների հետտրավմատիկ համախտանիշի դեմ պայքարը Իսրայելին կարժենա 53 միլիարդ դոլար. ԶԼՄ

Երկրի բնակիչների շրջանում հետտրավմատիկ սթրեսային խանգարման (PTSD) հետևանքներից Իսրայելի տնտեսության կորուստներն առաջիկա հինգ տարում կկազմեն մոտ 197 միլիարդ շեքել (53,2 միլիարդ դոլար): Այս մասին հայտնում է Jerusalem Post-ը։

Հետազոտությունն իրականացրել են SFI Group և MAPS Israel սոցիալական կազմակերպությունները, որոնք բուժման նորարարական մեթոդներ են մշակում: Նրանց գնահատմամբ, յուրաքանչյուր հիվանդի համար PTSD-ի բուժման արժեքը կկազմի մոտ 1,86 միլիոն շեքել (485 հազար դոլար): Այս գումարը կարող է մեծանալ մեկ քառորդով՝ կախված ախտորոշման հաստատման աստիճանից և անձի տարբեր նպաստների իրավունքի ճանաչումից։

Ենթադրյալ տնտեսական կորուստները ներառում են բուժման, ինչպես նաև հիվանդների աշխատունակության նվազման հետ կապված ծախսերը:

Հետտրավմատիկ սթրեսային խանգարումը, որը նաև հայտնի է որպես «աֆղանական» և «վիետնամական համախտանիշ», հատուկ հոգեկան խանգարումների համալիր է, որն առաջանում է կյանքի ծայրահեղ ծանր իրադարձություններից հետո, ներառյալ մարտական ​​գործողությունները: Նման հիվանդները դառնում են չափից դուրս ագրեսիվ կամ խուճապահար, եթե հայտնվում են այնպիսի իրավիճակներում, որոնք շատ նման են անցյալում իրենց վերապրածին կամ նմանատիպ հիշողություններ են առաջացնում նրանց մոտ: