Էրդողանը վերացրել է Իսրայելի հետ առևտրի բազմաթիվ սահմանափակումներ. Իսրայելի արտգործնախարար

Իսրայելի արտգործնախարար Իսրայել Կացը հայտարարել է, որ Թուրքիայի նախագահ Ռեջեփ Թայիփ Էրդողանն արդեն վերացրել է հրեական պետության հետ իր հանրապետության առևտրի մի շարք սահմանափակումներ, որոնք մտցվել էին Գազայի հատվածում տիրող իրավիճակի պատճառով։

«Էրդողանը հետ է կանչել կամ վերացրել առևտրային սահմանափակումներից շատերը, և ակնհայտ է, որ դաս է քաղել։ Մենք չպետք է տեղի տանք բռնապետի սպառնալիքներին ու պետք է այլընտրանքներ ստեղծենք և կախված չլինենք «Մուսուլման եղբայրների» մարդուց, որը կարող է ցանկացած պահի ամեն ինչ դադարեցնել»,- գրել է Իսրայելի արտգործնախարարը X-ի իր միկրոբլոգում։

Իսրայելի և Թուրքիայի հարաբերությունները կտրուկ վատթարացել են պաղեստինա-իսրայելական հակամարտության սրման հետնապատկերում։ Կողմերը բազմիցս միմյանց հասցեին կոշտ հայտարարություններ են հնչեցրել։ Իսրայելի ԱԳՆ-ն 2023 թվականի հոկտեմբերի վերջին իսրայելա-թուրքական հարաբերությունները վերագնահատելու նպատակով հայտարարեց դիվանագետներին Անկարայից հետ կանչելու մասին։ Թուրքիան իր հերթին խորհրդակցությունների համար Թել Ավիվից հետ է կանչել իր դեսպանին։

Թուրքիայի առևտրի նախարարությունն ապրիլի 9-ին սահմանափակումներ է մտցրել Իսրայելի հետ 54 ապրանքատեսակների, դրանց թվում՝ շինանյութերի, արդյունաբերական սարքավորումների և մետաղագործական ապրանքների առևտրի համար։