ՀՀ ԱԳՆ-ն արձագանքել է Դամասկոսում Իրանի հյուպատոսության վրա կատարված հարձակմանը

Հայաստանը խորապես մտահոգված է Դամասկոսում Իրանի հյուպատոսության վրա տեղի ունեցած հարձակման առնչությամբ։ Այս մասին նշված է ՀՀ արտաքին քաղաքական գերատեսչության՝ X-ի պաշտոնական էջում։

«Դիվանագիտական ներկայացուցչության անձեռնմխելիությունը պարտադիր է և չպետք է կասկածի տակ դրվի որևէ պատրվակով»,- շեշտվում է հաղորդագրության մեջ:

ՀՀ ԱԳՆ-ն ցավակցություն է հայտնել զոհերի և վիրավորների ընտանիքներին։

Հիշեցնենք, որ ապրիլի 1-ին Իսրայելը հրթիռային հարվածներ է հասցրել Դամասկոսում Իրանի դեսպանությանը, ինչի հետևանքով կան զոհեր։ Ավելի վաղ Իրանի արտաքին գործերի նախարար Հոսեյն Ամիր Աբդոլլահիանը X սոցցանցի իր էջում գրել էր, որ Իրանում Վաշինգտոնի շահերը ներկայացնող Շվեյցարիայի դեսպանատան աշխատակիցը կանչվել է Իրանի ԱԳՆ՝ Սիրիայի մայրաքաղաքում Իրանի հյուպատոսության վրա իսրայելական օդուժի հարձակումից հետո: Նրա միջոցով, նախարարի խոսքով, ԱՄՆ կառավարությանը՝ «որպես իսրայելական ռեժիմի կողմնակցի, կարևոր հաղորդագրություն է ուղարկվել»։

Հավելենք, որ ՄԱԿ-ի Անվտանգության խորհրդի նիստը՝ Իրանի հյուպատոսության վրա Իսրայելի հարվածի թեմայով, նշանակված է ապրիլի 2-ին, Երևանի ժամանակով 23:00-ին: