Կարևոր է հայության միասնական ջանքերով վճռական պայքար մղել հանուն համազգային խնդիրների․ Արցախի ԿԳՄՍ նախարար

ՀՅԴ «Արամ Մանուկյան» երիտասարդական կենտրոնում մեկնարկել է «Հայ ուսանողությունն Արցախի համար» հետազոտությունների մրցույթի ամփոփիչ միջոցառումը, որն իրականացվում է Արցախի Հանրապետության Կրթության, գիտության, մշակույթի եւ սպորտի նախարարության հետ համատեղ։

Ծրագրին հիմնական նպատակն է մեկտեղել հայ ուսանողության կարողությունը՝ քաղաքական, տնտեսական, իրավագիտական, մշակույթի և հետաքննողական լրագրության բնագավառներում։

Ըստ կազմակերպիչների՝ մրցույթի արդյունքում ստացվել են բազմաթիվ արժեքավոր հետազոտություններ, որոնք տրամադրվելու են հայանպաստ գործունեություն ծավալող ազդեցիկ հիմնարկների՝ արդյունավետ օգտագործման նպատակով։

Ծրագրին հետազոտություններ են ներկայացրել 12 ուսանող և 1 ուսանողական խմբակ՝ Հայաստանից, Արցախից, Լիբանանից, Իրանից և ԱՄՆ-ից ։  Արցախի ԿԳՄՍ նախարար Նորիկ Մկրտչյանն ասաց․ «Միջոցառումն անցկացվում է մեր երկրի համար ոչ դյուրին պայմաններում․ երբ մեր հարազատ բնօրրանը գտնվում է  ժամանակավոր բռնազավթված վիճակում ։ Կարևոր է ողջհայության միասնական  ջանքերով վճռական պայքար մղել հանուն համազգային խնդիրների»։

Մանրամասն՝ տեսանյութում։