Գազայում Իսրայելի գործողության 3-րդ փուլն է մեկնարկել

Իսրայելն ինտենսիվորեն շարունակում է ցամաքային գործողությունը Գազայի հատվածում, իսկ երկրի վարչապետ Բենյամին Նեթանյահուն հայտարարել է, որ չի համաձայնի հրադադարի։ Նեթանյահուն նաև հայտնել է Գազայում ռազմական գործողության 3-րդ փուլի մեկնարկի մասին։

«Հոկտեմբերի 7-ի սարսափելի հարձակումներից հետո Իսրայելը չի համաձայնի ռազմական գործողությունների դադարեցման։ Իսրայելին հասցեագրված հրադադարի կոչերը ՀԱՄԱՍ-ին, ահաբեկչությանը և բարբարոսությանը հանձնվելու կոչեր են։ Դա տեղի չի ունենա», - Նեթանյահուի հայտարարությունն է հրապարակել նրա մամուլի ծառայությունը։

Նեթանյահուն նաև մեջբերում է արել Աստվածաշնչից՝ նշելով, որ կա խաղաղության ժամանակ և պատերազմի ժամանակ։

«Հիմա ժամանակն է պատերազմի՝ հանուն մեր ընդհանուր ապագայի», - ասել է Իսրայելի վարչապետը։

«Մենք պատերազմի մեջ ենք:Մենք մեր առջև հստակ նպատակ ենք դրել՝ ոչնչացնել ՀԱՄԱՍ-ի ռազմական և վարչական ներուժը։ Մենք դա անում ենք համակարգված: Նախնական արգելափակման փուլն ավարտված է: Երկրորդ փուլը անընդհատ շարունակվող օդային հարձակումներն են։ Երրորդ փուլը Գազայի հատված ցամաքային ներթափանցման ընդլայնումն է»,- ասված է Իսրայելի վարչապետի հայտարարության մեջ, որը մեջբերում է կառավարության մամուլի ծառայությունը։