Խնդրում ենք Արցախում ցեղասպանված մեր հայրենակիցների մահվան 40-րդ օրը եկեղեցիներում իրականացնել հոգեհանգստի կարգ․ քանդակագործի նամակը՝ Գարեգին Բ-ին

Գյումրեցի քանդակագործ Արթուր Գևորգյանը նամակով դիմել է Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին՝ խնդրելով Արցախում ցեղասպանված մեր հայրենակիցների մահվան 40-րդ օրը՝ հոկտեմբերի 28-ին, եկեղեցիներում իրականացնել հոգեհանգստի կարգ, և գերեզմանոցներ գործուղել հայոց բնակավայրերի քահանաներին։

Ստորև ներկայացնում ենք քանդակագործի նամակը․

«Վեհափառ Տեր.

Հոկտեմբերի 28-ին լրանում է Արցախում ցեղասպանված մեր հայրենակիցների մահվան 40-րդ օրը։

Դաժանագույն, սահմռկեցուցիչ իրադարձությունից արթնանալ չենք կարող և մեր սփոփանքը չենք գտնում ցավից ու համազգային ցնցումից։

Որպես Հայ Առաքելական Եկեղեցու հետևորդ՝ իմ և իմ բազմաթիվ ընկերների անունից հոգաչափ խնդրում ենք Ձեզ այդ օրը եկեղեցիներում իրականացնել հոգեհանգստի կարգ, և գերեզմանոցներ գործուղել հայոց բնակավայրերի քահանաներին։

Արդարև, եթե չունենք մխիթարություն մարդկանց մեջ, մխիթարանք ու սփոփանք ենք ակնկալում Աստծուց և Հայ Առաքելական եկեղեցուց։

Խոնարհանքս Ձեզ և հայոց քահանայաց դասին։

Քանդակագործ Արթուր Գևորգյան»։