8 հակիրճ հարց ու պատասխան «Հայոց Երկիր» Ռազմավարական Ծրագրի մասին

8 հակիրճ հարց ու պատասխան «Հայոց Երկիր» Ռազմավարական Ծրագրի մասին

Հարց 1. Ինչո՞ւ է անհրաժեշտ ունենալ Ռազմավարական Ծրագիր

Պետության գերնպատակն է՝ ապահովել ազգի հարատև համակարգված անվտանգությունն ու զարգացումը, ինչը պահանջում է Ռազմավարական Ծրագրի տեսքով ունենալ պետության ռազմավարական և մարտավարական քայլերի համակարգ:

Այդ իմաստով, միայն Ռազմավարական Ծրագրի ներքո պետական կառավարման համակարգն ի զորու է համախմբել ազգի մարդկային և նյութական ներքին ռեսուրսները, ներառյալ՝ Սփյուռքը:

Հարց 2. Ինչո՞ւ մինչ այժմ չենք ունեցել Ռազմավարական Ծրագիր

Դարերով սեփական պետության բացակայությունը քայլ առ քայլ հայ ազգի մոտ թուլացրեց պետականության զգացումն՝ իր բոլոր կործանիչ հետևանքներով:

Առավելևս, որ տարբեր զավթիչների լծի տակ տևական ժամանակ մասնատված գոյատևումը հայ ազգի մոտ խորացրեց եսակենտրոնությունը, ինչպես նաև անձնական կամ, լավագույն դեպքում, նեղ խմբային (մասնավորապես՝ տոհմային) շահերի գերակայությունը:

Այդ ընթացքում վերացավ ազգային հիմքով դաստիարակված ու կրթված պետական կառավարչական վերնախավը և, որպես հետևանք, համազգային նշանակության սեփական որոշումներ կայացնելու, հետագա քայլերը պլանավորելու անհրաժեշտության գիտակցումը:

Հարց 3. Ինչի՞ն է հանգեցրել Ռազմավարական Ծրագրի բացակայությունը

Երբ չկա Ռազմավարական Ծրագիր, պետությունը կարճաժամկետ կտրվածքով դեռ կարող է գոյատևել, բայց արդեն միջնաժամկետ՝ ի վիճակի չէ ապահովել ազգի համակարգային անվտանգությունը, պաշտպանել տարածաշրջանային և աշխարհաքաղաքական իր շահերն ու արդյունավետ կազմակերպել ներքին կյանքը:

Այսպիսով, պետությունը կառավարման սուբյեկտից (ռազմավարական որոշումներ կայացնող և իրագործող) հետզհետե վերածվում է կառավարման օբյեկտի (ռազմավարական որոշումներ կայացնելու և իրագործելու անընդունակ)՝ ինչի ականատեսն ենք 1991-ից:

Փաստենք նաև, որ ՀՀ-ն և ԱՀ-ն արևելքից և արևմուտքից սահմանակից են Թուրքիա-Ադրբեջան ագրեսիվ տանդեմին, որի գլխավոր նպատակներից է՝ «Մեծ Թուրան» ծավալապաշտական նախագծի իրականացումն ու դրա թիվ 1 խոչընդոտ հանդիսացող հայկական 2 պետությունների ոչնչացումը:

Երկարաժամկետ կտրվածքով Ռազմավարական Ծրագրի բացակայությունը հանգեցնելու է տարածաշրջանում հայկական էթնոսի բնաջնջմանը, ինչպես դա եղավ Արևմտյան Հայաստանում:

Հարց 4. Ո՞րն է Ռազմավարական Ծրագրի առանցքը

Այսպիսով, Ռազմավարական Ծրագրի առանցքը դառնում է մերիտոկրատական (արժանիների իշխանություն) պետական կառավարման համակարգը, ըստ որի պետության բոլոր մակարդակներում և ոլորտներում կառավարումն իրականացնում են բարոյական, մասնագիտական և կամային հատկանիշներով օժտվածները։

Բացառապես արժանիների իշխանությունն է ի զորու զարգացնել ազգի մոտ եղած մրցակցային հատկանիշները, սերմացնել նորերը, վերացնել պատմական արատներն և քայլ առ քայլ Երկիրը կառավարման օբյեկտից վերածել կառավարման սուբյեկտի:

Հարց 5. Ռազմավարական Ծրագրի իրագործմանը խոչընդոտող ներքին գործոնները

Ներկայիս ՀՀ-ի և ԱՀ-ի կրթադաստիարակչական համակարգը միտված չէ և՛ հայրենասեր անհատի ձևավորմանը, և՛ գիտաինժեներական որակյալ մասնագետների պատրաստմանը, հակառակը՝ խթանում է ծառայություններ մատուցողների պատրաստմանը, սպառողական ապրելակերպի տարածմանը, հիմքում դնելով «հեշտ ապրելու» գաղափարը:

Մյուս կողմից՝ ազգային գաղափարախոսության բացակայությունը հանգեցնում է ազգային սնապարծության, դիվանագիտական դպրոցի բացակայության և համազգային ձախողումների մեջ ուրիշներին մեղադրելուն:

Այսպիսով՝ հասարակության ոչ մի շերտում տևական ժամանակ չի ձևավորվում պետական մտածողություն, հարգանք պետության և նրա ինստիտուտների նկատմամբ, և, որպես հետևանք, սեփական ապագան չի կապվում սեփական պետության հետ:

Հարց 6. Ռազմավարական Ծրագրի իրագործմանը խոչընդոտող արտաքին գործոնները

Արտաքին հիմնական խոչընդոտող գործոնը Թուրքիա-Ադրբեջան տանդեմն է՝ անգլոսաքսոնական աշխարհի ուղղորդմամբ, քանզի Մեծ Թուրանն ուղղված է Ռուսաստանի, Իրանի, Վրաստանի, Չինաստանի և, որոշ չափով, Արաբական Աշխարհի և Հնդկաստանի դեմ:

Ռազմավարական Ծրագրի իրագործումը բախվելու է թշնամի երկրների, ինչպես նաև նրանց հովանու տակ գտնվող գլոբալ խաղացողների և միջազգային կառույցների կատաղի դիմադրությանը, ընդհուպ՝ քաղաքական և տնտեսական մեկուսացման փորձերի, միջազգային հարթակներում հակահայկական քարոզչության տարածմանը և, ի վերջո՝ ուժի կիրառմանը։

Մյուս կողմից, Ռազմավարական Ծրագրի իրագործումը ոչ միանշանակ է ընկալվելու մեր թշնամիների հակառակորդների շրջանում, քանզի ցանկացած նոր ձևավորվող աշխարհաքաղակական սուբյեկտ երբեք չի կարող ընկալվել միայն բարիդրացիական դիրքերից, առավելևս, որ հայկական պետությունները միջազգային ասպարեզում մինչ այժմ երբեք չեն դրսևորել ընկալելի և կայուն արտաքին քաղաքականություն:

Հարց 7. Ինչպե՞ս կյանքի կոչել Ռազմավարական Ծրագիրը (մեկնարկային փուլ)

Ռազմավարական Ծրագրի կյանքի կոչման մեկնարկային փուլի ապահովման համար անհրաժեշտ է ստեղծել գաղափարակիցների կուռ խումբ, ընդլայնել աջակիցների շրջանակը և կազմակերպել քարոզչության ու ներգրավման լայնածավալ գործընթաց:

Զուգահեռ, հատուկ չափորոշիչներով, պետական կառավարման բոլոր մակարդակների և ոլորտների համար ընտրվելու ու հավաքագրվելու են արժանի կառավիրիչներ:

Նշված աշխատանքների հիմքում լինելու է Ռազմավարական Ծրագրի հրապարակման համար նախատեսված տարբերակը, որը ներկայացվելու է ՀՀ-ում, ԱՀ-ում և Սփուռքի բոլոր գաղթօջախներում:

Հարց 8. Ռազմավարական Ծրագրի 10 բաժինների համառոտ էությունը

Ռազմավարական Ծրագրի 10 բաժինները ներառում են պետության բոլոր կարևոր ոլորտները՝ պետական մերիտոկրատական կառավարման ներդնումը, համակարգային անվտանգության կազմակերպումը, մրցունակ տնտեսության կայացումը, շահավետ արտաքին հարաբերությունների ստեղծումը, բնակչության աճի ապահովումը, մարզերի և գյուղերի համաչափ զարգացումը, մրցունակ սերունդների ձևավորումը, Սփյուռքի համակարգված ներգրավումը, իրավական և մոբիլիզացիոն պաշտպանական համակարգերի ձևավորումը։

Նշված 10 բաժինների ամբողջական և հետևողական իրագործումը, մշակված մեխանիզմների միջոցով, հանգեցնելու է Երկրի կայացմանը՝ որպես հզոր, դինամիկ զարգացող, պաշտպանված ու մրցունակ պետություն։

«Հայոց Երկիր» Ռազմավարական Ծրագրի մշակող խումբ

04․08․2023թ