Ֆրանսիան կոչ է արել Ադրբեջանին իրականացնել ստանձնած միջազգային պարտավորություններն ու Հաագայի դատարանի որոշումը

Ֆրանսիան Ադրբեջանին կոչ է անում իրականացնել ստանձնած միջազգային պարտավորություններն ու իրագործել Լաչինի միջանցքով ազատ տեղաշարժը երաշխավորելու Միջազգային դատարանի փետրվարի 22-ի որոշումը։

Այս մասին նշվում է Ֆրանսիայի Հանրապետության արտաքին գործերի նախարարության այսօր տարածած հայտարարության մեջ։

«Ֆրանսիան ցավում է Ադրբեջանի կողմից Լաչինի միջանցքի շարունակվող շրջափակման առիթով, որը հակասում է հրադադարի համաձայնագրով ստանձնած պարտավորություններին և վտանգում բանակցային գործընթացին։ Մեր լիակատար աջակցությունն ու համաձայնությունն ենք հայտնում ԵՄ Արտաքին գործերի և անվտանգության քաղաքականության հարցերով բարձր ներկայացուցչի՝ հուլիսի 26-ի հայտարարությանը՝ Լեռնային Ղարաբաղի բնակչության վրա ազդող հումանիտար իրավիճակի վերաբերյալ։

Ֆրանսիան Ադրբեջանին կոչ է անում իրականացնել ստանձնած միջազգային պարտավորություններն ու իրագործել Միջազգային դատարանի փետրվարի 22-ի որոշմամբ նախանշված ժամանակավոր միջոցները, որոնք պարտադիր են։

Պահանջում ենք վերականգնել մարդկանց, ապրանքների և բեռների ազատ տեղաշարժը Լաչինի միջանցքի երկու ուղղություններով, ինչպես նաև ապահովել բնակչությանը գազով և էլեկտրաէներգիայի անխափան մատակարարմաբ։

ԵՄ-ի հետ միասին, Ֆրանսիան շարունակում է լիովին հավատարիմ մնալ տարածաշրջանում արդար և կայուն խաղաղության հաստատմանը, ուղերձ, որն արտահայտվել է ԵՄ ներկայացուցչի և Արտաքին գործերի նախարարի կողմից ապրիլի վերջին Հայաստան և Ադրբեջան կատարած այցի ընթացքում»,- հայտարարել է Ֆրանսիայի ԱԳՆ-ն։