Հայաստանում Փաշինյանի դեմ բացասական տրամադրություններ կան, բայց նա հետ քայլ չի արել. Էրդողանը գովել է Փաշինյանին

Թուրքիայի նախագահ Ռեջեփ Թայիփ Էրդողանն ինքնաթիռում լրագրողների հետ զրույցում ընդգծել է, որ Բաքվի և Երևանի միջև հարաբերությունների կարգավորման գործընթացը էական ներդրում կունենա Թուրքիայի և Հայաստանի միջև խաղաղ գործընթացի խթանման գործում։

«Մի տարածաշրջանում, որտեղ շատ վիշտ է եղել, խաղաղության դռները կիսաբաց են: Ուստի կողմերը չպետք է բաց թողնեն այս հնարավորությունը և պետք է գործեն պատասխանատվությամբ»,- ընդգծել է Թուրքիայի նախագահը:

Էրդողանը նաև «կարևոր» է անվանել Հայաստանի վարչապետի խոսքերը Ադրբեջանի տարածքային ամբողջականության ճանաչման վերաբերյալ, այդ թվում՝ Ղարաբաղի։

«Սակայն, ինչպես ավելի վաղ ասացի, Հայաստանում Փաշինյանի դեմ բացասական տրամադրություններ կան, և սա շատ, շատ կարևոր կետ է, մինչև այսօր Փաշինյանը ոչ մի քայլ հետ չի արել»,- ասաց քաղաքական գործիչը։