Հայաստանը Ադրբեջանին պետք է հանձնի 8 սահմանամերձ գյուղ. ՄԱԿ-ում Ադրբեջանի ներկայացուցիչ

ՄԱԿ-ում Ադրբեջանի մշտական ներկայացուցիչ Յաշար Ալիևը հայտարարել է, որ հարաբերությունների լիարժեք կարգավորման համար Երևանը պետք է կատարի ութ պայման։

Նա այդ պայմանները հնչեցրել է Նյու Յորքում ՄԱԿ-ի Անվտանգության խորհրդի բաց բանավեճի ժամանակ։ Այս մասին հայտնում է Интерфакс-Азербайджан-ը։

Ըստ նրա՝ «Հայաստանը պետք է. կատարի միջազգային իր պարտավորությունները, Ադրբեջանի տարածքից ամբողջությամբ դուրս բերի իր զինված ուժերը, վերադարձնի Ադրբեջանի դեռևս «օկուպացված» ութ սահմանամերձ գյուղերը, դադարեցնի և զերծ մնա տարածքային պահանջներից, անօրինական գործողություններից և ապատեղեկատվությունից, վերջ դնի ականային ահաբեկչությանը, լույս սփռի մի քանի հազար ադրբեջանցիների ճակատագրի վրա, որոնք անհետացել են հակամարտության ընթացքում, փոխհատուցի Ադրբեջանին պատճառված վնասը, բարեխղճորեն վարի բանակցությունները խաղաղության պայմանագրի կնքման և երկու պետությունների միջև սահմանի սահմանազատման շուրջ»։