Պակիստանի մարդաշատ շուկայում պայթյուն է որոտացել․ առնվազն 5 մարդ զոհվել է

Կիրակի օրը Պակիստանի հարավ-արեւմուտքում մարդաշատ շուկայում տեղի ունեցած պայթյունի հետեւանքով առնվազն 5 մարդ է զոհվել, եւս 16-ը վիրավորվել է, հայտնում է The Associated Press-ը՝ վկայակոչելով տեղի իշխանություններին:

Առայժմ ոչ ոք չի ստանձնել հարձակման պատասխանատվությունը Բարխանում, որը գտնվում է նահանգի մայրաքաղաք Քվետա քաղաքից 600 կմ հյուսիս-արեւելք:

Տեղի ոստիկանապետը հայտնել է, որ ռումբը, ըստ երեւույթին, ամրացված է եղել մոտոցիկլետի վրա եւ պայթեցվել է հեռակառավարման վահանակի միջոցով:

Պայթյունի հետեւանքով վնաս է հասցվել նաեւ մի շարք խանութների։ Փրկարարները վիրավորներին տեղափոխել են հիվանդանոց։

Բելուջիստանում երկար ժամանակ պայքար է ընթանում Բելուջիստանի ազատագրական բանակի եւ այլ փոքր խմբերի դեմ, որոնք անկախություն են պահանջում Իսլամաբադի կենտրոնական կառավարությունից:

Իշխանությունները պնդում են, որ ճնշել են ապստամբությունը, սակայն բռնությունները շարունակվում են։ Անհանգիստ նահանգի վրա հարձակումներ են գործում ինչպես պակիստանյան թալիբները, այնպես էլ «Իսլամական պետություն» խմբավորումը:

Բելուջիստանի գլխավոր նախարար Աբդուլ Քուդուս Բիզենջոն կատարվածը ահաբեկչական հարձակում է անվանել։