Ի՞նչ իրավիճակ է Սոթքում. ներկայացնում է վարչական ղեկավարը

Գեղարքունիքի մարզի Սոթք բնակավայրում ադրբեջանական սեպտեմբերի ագրեսիայից հետո քաղաքացիական կյանքը վերականգնվում է:

Նշենք, որ Սոթքը ադրբեջանական ագրեսիայից ամենաշատ տուժած բնակավայրերից էր:
«Փաստինֆո»-ի հետ զրույցում Սոթքի վարչական ղեկավար Սևակ Խաչատրյանը հայտնեց, որ այս օրերին գյուղում իրավիճակը հանգիստ է.

«Մեզ մոտ ամեն ինչ կարգին է, կրակոցներ հնարավոր է լինեն, բայց մեզ մոտ չեն լսվում»,-վստահեցրեց նա:

Տարհանված բնակիչների մեծ մասն արդեն վերադարձել է գյուղ և շարունակում է իր առօրյա կյանքով ապրել: Սոթքի դպրոցը և մանկապարտեզը նույնպես նորմալ գործում են:

Թշնամու կրակոցների հետևանքով վնասվել էր գյուղի գազատար խողովակը և ողջ էլեկտրականությունը, որոնք, ինչպես Սևակ Խաչատրյանը հայտնեց, արդեն վերականգնվել են:

Սոթքի վարչական ղեկավարի փոխանցմամբ՝ թշնամու ագրեսիայից տուժած քաղաքացիներին գումարային փոխհատուցում է տրվել, որպեսզի նորոգեն իրենց բնակարանները.

«Ենթակառուցվածքները հենց հաջորդ օրը վերականգնվել են: Բնակարանների նորոգման գործընթացը դեռ ընթացքի մեջ է»,-ասաց Սևակ Խաչատրյանը: