Խաղաղությունը կարող է լինել միայն հավասարության հիմքի վրա եւ արդարության հաստատումով

Նոյեմբերի 5-ին Փարիզի «Այբ. Էֆ.Էմ.» հայկական ռադիոկայանի հյուրն էր ՀՅԴ Բյուրոյի ներկայացուցիչ Հակոբ Տեր- Խաչատուրյանը:

Հաղորդման ժամանակ անդադարձ է կատարվել ՀՅԴ վերջին Ընդհանուր ժողովի ժամանակ Դաշնակցության որդեգրած ռազմավարական որոշումներին, Հայաստան-Սփյուռք գագաթաժողովին, հայ -թուրքական հարաբերություններին, հոկտեմբերի 30-ին Ստեփանակերտում տեղի ունեցած հանրահավաքին եւ որպես այդ համաարցախյան հանարահավաքի արձագանք՝ նոյեմբերի 5- Երեւանում կայացած Միասնության հանրահավաքի նշանակության մասին:

Պատասխանելով հարցին, թե որն է նոյեմբերի 5-ի հանրահավաքի նպատակը՝ Հակոբ Տեր-Խաչատուրյանը նշել է. «Նպատակը Արցախին նեցուկ կանգնելն է, հանուն Արցախի, հանուն հայրենիքի միասնական նպատակի հետապնդումը: Այն շարունակությունն է հոկտեմբերի 30-ի Ստեփանակերտի հանրահավաքի, որպեսզի արցախի ժողովուրդը զգա, որ Հայաստանն իր կողքին է եւ ոչ մի ձեւով չի հրաժարվի իրեն օժանդակելուց եւ ամուր կանգնած է Արցախի իրավունքների կողքին»:

Անդրադառնալով ՀՀ իշխանությունների «խաղաղության օրակարգին»՝ ՀՅԴ Բյուրոյի ներկայացուցիչը նշել է, որ դա Հայաստանին պարտադրված կեղծ օրակարգ է, մոլորեցնող քայլ: «Մենք գիտենք, որ հաղթող կողմը մեծահոգության շնորհիվ չէ, որ գնում է խաղաղության: Ընդհակառակը՝ Թուրքիայի եւ Ադրբեջանի նման թշնամի երկրները, որոնք Հայաստանի պարտության եւ արյան հոտն են առել, ձգտում են հասնել առավելագույնին: Մինչդեռ խաղաղությունը կարող է լինել միայն հավասարության հիմքի վրա եւ արդարության հաստատումով», – ասել է Հակոբ Տեր-Խաչատուրյանը: