Իրանը դեմ է միջազգայնորեն ճանաչված սահմանների փոփոխությանը. Էբրահիմ Ազիզի

Իրանը դեմ է միջազգայնորեն ճանաչված սահմանների փոփոխությանը։ Այս մասին Թեհրանում Իրան-Հայաստան պատգամավորական բարեկամության խմբի ղեկավար Գեւորգ Պապոյանի հետ հանդիպմանը հայտարարել է Իրանի խորհրդարանի ազգային անվտանգության եւ արտաքին քաղաքականության հանձնաժողովի փոխնախագահ Էբրահիմ Ազիզին, գրում է Mehr-ը։

Նա նշել է, որ Իրանն ու Հայաստանը երկկողմ հարաբերություններն ամրապնդելու մեծ հնարավորություններ ու ներուժ ունեն։ Նրա խոսքով, Երեւանի եւ Բաքվի միջեւ հակամարտությունը մտահոգում է Իրանի պաշտոնյաներին։ «Իրանը երկու հակամարտող կողմերին կոչ է անում զսպվածություն ցուցաբերել, որպեսզի բացառվի ուժի եւ հարկադրանքի կիրառումը՝ տարաձայնությունները հարթելու համար, բանակցությունները պետք է լինեն հիմնարար անհրաժեշտություն՝ տարածաշրջանում խաղաղության եւ անվտանգության վերականգնման համար»,- ասել է Ազիզին։ Ընդգծելով, որ տարածաշրջանային խնդիրները տարածաշրջանի երկրներն իրենք պետք է լուծեն՝ նա ընդգծել է, որ խնդիրը լուծելու պատրվակով չպետք է թույլ տալ ոչ տարածաշրջանային երկրներին տարածաշրջան մտնել։

Պապոյանը նշել է, որ Հայաստանն Իրանը դիտարկում է որպես շատ հզոր ու կարեւոր երկիր տարածաշրջանում, եւ ոչ տարածաշրջանային երկրները չեն կարող արատավորել երկու երկրների բարեկամական ու վաղեմի կապերը։