Էկոնոմիկայի նախարարությունը կորոնավիրուսի ժամանակ հյուրանոցների և սննդի համար վճարել է նախատեսվածից ավելի շատ

Էկոնոմիկայի նախարարությունը կորոնավիրուսի համավարակի ժամանակ չնախատեսված և անհարկի ծախսեր է իրականացրել. սա պարզ է դառնում Հայաստանի Հանրապետության Հաշվեքննիչ պալատի 2021 թ. գործունեության վերաբերյալ տարեկան հաղորդումից։

Այսպես՝ 2020 թ. Առողջապահության նախարության տրամադրած՝ մեկուսացվածների թվի և Էկոնոմիկայի նախարարության կողմից վճարված սննդի ու հյուրանոցային ծառայություն ստացող անձանց թվի միջև արձանագրվել են շեղումներ, նաև՝ 187 մլն 943 հազար դրամի չափով 10.225 հատ հյուրանոցային ծառայությունների և 23.385 հատ սննդի ծառայությունների շեղումներ։

Բացի դրանից՝ 2020 թ. մարտի 27-ից մայիսի 31-ն ընկած ժամանակահատվածում Էկոնոմիկայի նախարարությունը վարձակալել է հյուրանոցներ՝ ամբողջապես՝ առանց հաշվի առնելու, թե որքան է մեկուսացման իրական կարիքն ու մեկուսացվածների թիվը. նախարարությունը հյուրանոցներին վճարել է 906 մլն 703 հազար դրամ, այդ թվում՝ ազատ մնացած սենյակների համար։

Նշվում է նաև, որ նախարարությունը մեկուսացվածների սննդի համար վճարումներ կատարելիս 100 հազար հատ նախաճաշով և 50000 հատով ավելի սննդի տրամադրում է կատարել, սակայն որևէ պարզաբանում չի ներկայացրել՝ հիմնավորելով այդ ծախսերի անհրաժեշտությունը։