Ռուսաստանը գրավել է հացահատիկի համաշխարհային շուկան. The Times

Ռուսաստանը վերահսկողության տակ է վերցրել ցորենի համաշխարհային շուկան՝ օտար երկրներին մեղադրելով Ուկրաինայի շուրջ հացահատիկի ճգնաժամ ստեղծելու մեջ։ Այս մասին գրում է բրիտանական The Times-ը։

Զեկույցի համաձայն՝ ապրիլին Ուկրաինայից ցորենի արտահանումը, 2021 թվականի նույն ժամանակահատվածի համեմատ, կրճատվել է 32%-ով, մինչդեռ ռուսական արտահանումը, ընդհակառակը, աճել է 18%-ով։

Բրիտանական հրատարակության տվյալներով՝ այս պահին Ուկրաինայից ավելի քան 20 միլիոն տոննա հացահատիկ չի կարող հասնել նպատակային կետեր։ Իսկ համաշխարհային շուկայում ձեւավորված բացը լցրել է Ռուսաստանը։ Ընդ որում՝ Ռուսաստանը ոչ միայն ավելի շատ ապրանք է վաճառում, այլեւ՝ ավելի թանկ գնով։

Կրեմլը հերքում է ԱՄՆ-ի և ԵՄ-ի պնդումները, թե Ռուսաստանն արգելափակել է հացահատիկի արտահանումն Ուկրաինայից, և մեղադրում է Արևմուտքին պատժամիջոցներ սահմանելու պատճառով նման իրավիճակ ստեղծելու մեջ։