Վրաստանում ադրբեջանցիները կկարողանան հրաժարվել ռուսականացված ազգանուններից

Վրաստանի քաղաքացիներին, որոնք ազգությամբ ադրբեջանցիներ են, կարող են թույլատրել հրաժարվել ռուսականացված ազգանուններից. հայտնում է Euronews Georgia-ն։

Հրատարակության համաձայն՝ «Ազգանունը պատմամշակութային ավանդույթներին համապատասխան փոխելու իրավունքի մասին» օրենսդրական նախաձեռնությունը ներկայացվել է Վրաստանի խորհրդարանի քննարկմանը և այժմ հանրային քննարկումների է դրվել: Փոփոխությունների շնորհիվ ադրբեջանցիները կկարողանան հրաժարվել իրենց ազգանունների ռուսական վերջածանցներից՝ «ով», «ովա», «և», «ևա»։ Գործընթացը սկզբունքորեն տարբերվելու է անվանափոխության ստանդարտ ընթացակարգերից՝ ավելի հեշտ ու արագ. գրում է լրատվամիջոցը։

Խորհրդային ժամանակաշրջանում փոխված իսկական ազգանունները վերադարձնելու իրավունքի մասին նախաձեռնությամբ հանդես է եկել «Սալամ» քաղաքացիական կազմակերպությունը։ Անցյալ տարի Վրաստանում «Վերադարձրու իմ ազգանունը» արշավի շրջանակներում ակտիվիստները դրա օգտին հավաքեցին ավելի քան 27000 ստորագրություն: