Ի՞նչ է նշանակում՝ երեխաներին վանդակի նման փակել դպրոցում․ ինչ իշխանությունն է, այն էլ իրենց կադրերն են

Ոչ ոք իրավունք չունի դպրոցի դարպասները փակելու աշակերտի ծնողի առջև։ Խնդրել ենք՝ տնօրենն իջնի և պարզաբանի, թե ինչու են դարպասները փակել։ Այս մասին Չեխովի անվան դպրոցի մոտ ասաց աշակերտներից մեկի ծնողը։

Նշենք, որ Երևանի Ա. Չեխովի անվան հ.55 հիմնական դպրոցի տնօրենի պաշտոնի թափուր տեղի համար անցկացվում է հերթական մրցույթը։  Երկուշաբթի եղել է մանկավարժական խորհրդի նիստ, որի ընթացքում ընտրել են ուսուցիչները, հաջորդ օրը` ծնողները, իսկ  այսօր  ընտրություն է  կատարում խորհուրդը, որը կազմված է 9 անդամից. երկուսը մանկավարժներ են, երկուսը` ծնողներ, չորսը՝  լիազոր մարմնի ներկայացուցիչներ:

«Ի՞նչ է նշանակում՝ երեխաներին վանդակի նման փակել դպրոցում․ ինչ իշխանությունն է, այն էլ իրենց կադրերն են։ Պահանջում ենք գա քաղաքապետարանի ներկայացուցիչը, բերի գրավոր օրենքը, որում գրված է, որ պետք է դպրոցի դարպասը փակ լինի, երեխաներին պետք է պահեն փակի տակ»,- ասաց ծնողը։

 Հիշեցնենք, որ նախկին տնօրեն Գայանե Սարուխանյանի պաշտոնավարման պայմանագիրը լրացել է դեկտեմբերի 15-ին, որից հետո , քաղաքապետի որոշմամբ, պաշտոնակատար է նշանակվել նույն դպրոցի երկարամյա մանկավարժ Տաթևիկ Մելքոնյանը՝  մինչև մրցույթի կայանալն ու վերջնական արդյունքների հրապարակումը։  Սակայն  Տաթևիկ Մելքոնյանին հայտնել են, որ ինքն այլևս պաշտոնակատար չէ, փոխարենը նշանակվել է մեկ ուրիշը, որը քաղաքապետի ՔՊ-ական թեկնածու Տիգրան Ավինյանի ընկերոջ կինն է՝ Դիանա Մինասյանը, և տնօրենի ընտրության առաջին փուլում գրանցել է զրո արդյունք։