Այս ԱԺ-ի ընդդիմությունը կոֆե խմող ընդդիմություն չէ․ Հայկ Մամիջանյան

Այս օրենսդրական նախաձեռնությունը կատարում ենք նրա համար, որպեսզի էլ ոչ մեկը երբեք լկտիություն չունենա ասելու՝ «ինչ պետք է, էդ էլ բանակցում ենք», որպեսզի երբեք ԱԺ-ն, որն առաջանային մանդատը կրող կառույց է և ներկայացնում է մեր ժողովրդին, այլևս չհայտնվի լուսանցքում։ Այս մասին ԱԺ-ում կազմակերպված լսումների ժամանակ ասաց «Պատիվ ունեմ» խմբակցության քարտուղար Հայկ Մամիջանյանը։

«Այս գումարման ԱԺ-ի ընդդիմությունը կոֆե խմող ընդդիմություն չէ, մենք չենք լեգիտիմացնում իշխանության ապազգային որոշումները․․․ Օրենքը ենթադրում է, որ ԱԳ նախարարը և վարչապետը, համապատասխանաբար, 3 և 6 ամիսը մեկ գրավոր, փակ-գաղտնի ֆորմատով զեկույց են ներկայացնելու ԱԺ-ին հիմնական արտաքին քաղաքականության բանակցային ուղղություններում կատարված աշխատանքի և առկա վիճակի վերաբերյալ»,- ասաց Մամիջանյանը։

Նշենք, որ ԱԺ-ում, «Պատիվ ունեմ» խմբակցության նախաձեռնությամբ, տեղի են ունենում խորհրդարանական լսումներ ««Ազգային ժողովի կանոնակարգ» սահմանադրական օրենքում լրացում կատարելու մասին» օրենքի նախագծի վերաբերյալ: