Ռուսաստանն ու Բելառուսը կրում են պատերազմի ողջ պատասխանատվությունը. ԵՄ

Մարտի 10-ին Ֆրանսիայի Վերսալ քաղաքում տեղի է ունեցել Եվրոպական խորհրդի ոչ պաշտոնական նիստ, որից հետո պետությունների և կառավարությունների ղեկավարներն ընդունել են ընդհանուր հայտարարություն։ Մարտի 11-ի գիշերը փաստաթուղթը հրապարակվել է ԵՄ խորհրդի կայքում։

Եվրոպացի առաջնորդները Ռուսաստանի ներխուժումն Ուկրաինա անվանում են «չհրահրված և չարդարացված» և կատարվածի համար մեղադրում են Ռուսաստանին ու Բելառուսին:

«Երկու շաբաթ առաջ Ռուսաստանը պատերազմը վերադարձրեց Եվրոպա։ Ուկրաինայի դեմ չհրահրված և չարդարացված պատերազմը կոպտորեն խախտում է միջազգային իրավունքը և ՄԱԿ-ի կանոնադրության սկզբունքները, խաթարում եվրոպական և համաշխարհային անվտանգությունն ու կայունությունը։ Դա անասելի տառապանքներ է պատճառում Ուկրաինայի բնակչությանը։ Ռուսաստանը և նրա հանցակից Բելառուսը կրում են այս ագրեսիվ պատերազմի ողջ պատասխանատվությունը, և մեղավորները պատասխանատվության կենթարկվեն իրենց հանցագործությունների համար, ներառյալ՝ խաղաղ բնակչության և քաղաքացիական օբյեկտների վրա անկանոն հարձակումների»,- ասվում է հայտարարության մեջ։

Փաստաթղթի հեղինակները ողջունում են Միջազգային քրեական դատարանի դատախազի՝ հետաքննություն սկսելու որոշումը և կոչ անում Ռուսաստանին՝ անհապաղ դադարեցնել ռազմական գործողությունները, դուրս բերել իր բոլոր զորքերը, ապահովել Ուկրաինայի միջուկային օբյեկտների անվտանգությունը, հարգել նրա տարածքային ամբողջականությունը, ինքնիշխանությունը և անկախություն միջազգայնորեն ճանաչված սահմաններում: