Ադրբեջանի իշխանությունն է կրում իր սադրանքների զոհերի պատասխանատվությունը. Շավարշ Քոչարյան

Այսօր Հանրային հեռուստաընկերության Օրակարգ ծրագրին տված հարցազրույցում ԱԳ փոխնախարար Շավարշ Քոչարյանն անդրադարձել է երեկ ղարաբաղա-ադրբեջանական շփման գծում իրավիճակի սրացմանը: Հիշեցնենք, որ Ադրբեջանի սադրիչ գործողություններին ի պատասխան հայկական կողմը համարժեք գործողությունների է դիմել, որի հետևանքով ադրբեջանական կողմը կորուստներ է տվել` խաղաղ բնակչության շրջանում:

 ԱԳ փոխնախարարի խոսքով` բոլոր զոհերի համար պատասխանատվությունը կրում է Ադրբեջանն իր սադրիչ գործողություններով:

« Սա Բաքվի` հարևան ժողովրդի հանդեպ ատելության եւ սեփական ժողովրդի արյան վրա հիմնված ժառանգական ռեժիմի հերթական հանցագործությունն է: Ակնհայտ է, որ Ադրբեջանի հետաքննության մեխանիզմի ներդրումից հրաժարվելն ուղղված է իր իսկ կողմից շարունակական սադրանքների կազմակերպման մեղքը հայկական կողմերի վրա բարդելու ձգտմանը: Քանի դեռ Ադրբեջանը չի կատարում 1994-1995թթ. ռազմական գործողությունների եւ կրակի դադարեցման եռակողմ համաձայագրերով իր միջազգային պարտավորությունները, հրաժարվում է Վիեննայի եւ Սանկտ Պետերբուրգի` կրակի դադարեցման ռեժիմի ամրապնդմանն ուղղված համաձայնությունների կատարումից եւ շարունակում է զինված սադրանքներ նախաձեռնել Արցախի եւ Հայաստանի դեմ, հենց Ադրբեջանի ղեկավարությունն է կրում այդ սադրանքների բոլոր զոհերի համար պատասխանատվությունը` անկախ նրանց ազգային պատկանելիությունից»,- ասել է Շավարշ Քոչարյանը: