Թուրքիայի խորհրդարանի նախագահը պաշտոնական այցով կմեկնի Վրաստան

Թուրքիայի Ազգային մեծ ժողովի նախագահ Մուստաֆա Շենթոփը փետրվարի 21-ին պաշտոնական այցով կմեկնի Վրաստան։ Այս մասին հայտնում է Վրաստանի ԱԳՆ մամուլի ծառայությունը։

Այցի ընթացքում Շենթոփը կհանդիպի Վրաստանի խորհրդարանի նախագահ Շալվա Պապուաշվիլիի, նախագահ Սալոմե Զուրաբիշվիլիի և վարչապետ Իրակլի Ղարիբաշվիլիի հետ։

Թուրքիայում Վրաստանի դեսպան Գիորգի Ջանջգավայի խոսքով՝ հանդիպումների ընթացքում կքննարկվեն տարբեր ոլորտներում երկու երկրների հարաբերությունների խորացումը և հիմնական մարտահրավերները ինչպես տարածաշրջանում, այնպես էլ համաշխարհային մասշտաբով։

Վրաստանը և Թուրքիան դիվանագիտական հարաբերություններ են հաստատել 1992 թվականի մայիսի 21-ին։ Երկրները համագործակցում են առևտրի, տնտեսության, էներգետիկայի, տարածաշրջանային անվտանգության, կրթության ոլորտներում և միմյանց համարում են ռազմավարական կարևոր գործընկերներ։

Թուրքիան Վրաստանի խոշորագույն առեւտրային գործընկերն է։ Վրաստանի և Թուրքիայի արտաքին առևտրաշրջանառությունը 2021 թվականի սկզբից կազմել է մոտ 1,9 մլրդ դոլար, ինչը կազմում է Վրաստանի ընդհանուր ապրանքաշրջանառության 14,8%-ը։

Հարևան երկրների միջև առևտրաշրջանառությունը, 2020 թվականի հունվար-նոյեմբերի համեմատ, աճել է 32,6%-ով։