Վանի Արտամետ քաղաքում Արշիլ Գորկուն նվիրված շատրվանը ոչնչացվել է

«Արշիլ Գորկու շատրվանը», կառուցված Վանի Էդրեմիտ (պտմ. Արտամետ) շրջանի քաղաքապետարանի կողմից 2015 թ., ջրազրկվել, իսկ հետո նաև ոչնչացվել է. հայտնում է Gazete Duvar-ը:

Հայ անվանի նկարիչ Արշիլ Գորկին (Ոստանիկ Ադոյան) ծնվել է շրջանի Խորգոմ գյուղում` ներկայումս Դիլքայա թաղամաս, 1915 թ. Հայոց ցեղասպանության ժամանակ գաղթել է, այնուհետև տեղափոխվել ԱՄՆ:

Տեղի բնակչության կողմից «Գորկու շատրվան» անունով հայտնի հուշարձանը կառուցվել է քրդամետ Demokratik Bölgeler Partisi կուսակցության («Ժողովրդավարական շրջաններ» կուսակցություն)` քաղաքում կառավարելու ժամանակ:

Հուշարձանի վրա առկա էին հայերեն, քրդերեն, անգլերեն և թուրքերեն կենսագրական տվյալներ:

Երբ քրդական կուսակցությունը հեռացվեց քաղաքի ղեկավարումից (էրդողանական ռեժիմի կողմից), սկսվեց «պայքար» շատրվանի դեմ: Նախ՝ անջատվել էր ջուրը, հետո՝ հեռացվել Գորկու անունը, հետո էլ՝ քառալեզու գրությունները:

Քաղաքի ներկայիս իշխանությունները նշել են, որ ջուրն անջատել են բնակչության ջրի կարիքներն ապահովելու համար, բայց հուշարձանի քանդումից «տեղեկություններ չունեն»: