Իշխանությունը հանցանք է կատարում և հանցակից դարձնում բազմաթիվ պաշտոնյաների․ Ռոբերտ Քոչարյան

Այս իշխանությունը հրաժարվեց այն սկզբունքից, որի դրոշների տակ եկել է իշխանության։ Այս մասին այսօր՝ դեկտեմբերի 27-ին, ասուլիսի ժամանակ ասաց ՀՀ երկրորդ նախագահ Ռոբերտ Քոչարյանը։

«Այս առումով հետաքրքիր էր Հայկ Մարությանի ելույթը։ Երբ մենք ենք դա ասում, ընկալումն այլ է, երբ իրենց թիմի կարկառուն ներկայացուցիչն է ասում, ընկալումն այլ է։ Հիմա ինչ կատարվում է կալանավորումների հետ, մի խայտառակություն է։ Կալանավորումների այն քանակը, որն այսօր է, երբևէ որևէ իշխանության մոտ ուղղակի չի եղել։ Իմ նախագահության ժամանակ ՏԻՄ-երին երբեք ուժային կառույցները չեն մասնակցել, երբեք այսպիսի ներգրավվածություն չի եղել։ Այն ժամանակ, երբ վարչապետ էր Անդրանիկ Մարգարյանը, որը կուսակցական էր, և կար շատ բնական ցանկություն կուսակցության կողմից մասնակցելու ամեն տեղ, ես զսպում էի միշտ և ասում էի, որ սա ՏԻՄ ընտրություններ են, և ով էլ ընտրվի, ցանկանալու է իշխանության հետ, կառավարության հետ լավ հարաբերություններ ունենալ»,- ասաց Քոչարյանը։