Բելառուսը շնորհակալություն է հայտնել «եղբայրական Ադրբեջանին»` հակաբելառուսական հոդվածին չմիանալու համար

Բելառուսը շնորհակալություն է հայտնում եղբայրական Ադրբեջանին հետևողական և անզիջում աջակցության համար. հայտարարել է Բելառուսի ԱԳՆ խոսնակ Անատոլի Գլազը. հայտնում է BelTA-ն։

Հարցը վերաբերում էր Արևելյան գործընկերության գագաթնաժողովի ընդունած հռչակագրում Բելառուսին վերաբերող 11-րդ կետին, որին Ադրբեջանը հրապարակայնորեն չէր միացել։

Անատոլի Գլազը հիշեցրել է, որ Բելառուսին և Արևելյան գործընկերության երկրներին առաջին հերթին կապում է ընդհանուր պատմությունը, ժողովուրդների սերտ բարեկամությունը, փոխշահավետ առևտրատնտեսական համագործակցությունը, կառուցողական փոխգործակցությունը ԱՊՀ հարթակում և ինտեգրացիոն այլ ձևաչափերում, այլ ոչ թե ԵՄ քաղաքականացված նախաձեռնությունը։

«Իհարկե, մենք ակնկալում էինք, որ Բրյուսելում Արևելյան գործընկերության գագաթնաժողովին ներկա բարեկամ երկրները միանշանակ կդատապարտեն հակաբելառուսական հայտարարություններն ու գործողությունները»,- ասել է ԱԳՆ մամուլի քարտուղարը։