Ռուսաստանը հայտարարել է «Բայրաքթարի» նկատմամբ իրենց անօդաչու թռչող սարքերի գերազանցության մասին

Անօդաչու սարքերը, որոնք մշակվում են Ռուսաստանում, գերազանցում են թուրքական հարվածային «Բայրաքթար» անօդաչու թռչող սարքին։ Այս մասին RBC հեռուստաալիքին տված հարցազրույցում ասել է ՌԴ փոխվարչապետ Յուրի Բորիսովը։

«Ռուսական մշակումները ոչ միայն չեն զիջում, այլ նաև տեխնիկական բնութագրերով գերազանցում են ձեր նշած անօդաչու համալիրին»,- ասել է Բորիսովը՝ պատասխանելով թուրքական «Բայրաքթար»ճի հետ մրցակցության մասին հարցին։

Փոխվարչապետը հավելել է, որ Ռուսաստանը կարող է անօդաչու սարքերով հետաքրքրել օտարերկրյա գնորդներին։ «Վերջին ցուցահանդեսը Դուբայում, որտեղ մենք արդեն ներկայացրել ենք մեր նմուշները, կբացի շուկայական մեկ այլ մակարդակ, և Ռուսաստանը կարող է մտնել այս տեսակի զենքեր արտահանող երկրների ակումբ»,- ասել է Բորիսովը։