ԵՄ ԱԳ նախարարները պատժամիջոցներ կընդունեն «Վագների» դեմ

Բրյուսելում կայանալիք հանդիպմանը ԵՄ ԱԳ նախարարները կքննարկեն Ուկրաինայում տիրող իրավիճակը և պատժամիջոցներ կընդունեն ռուսական «Վագներ» մասնավոր ռազմական ընկերության  դեմ։ Այս մասին ավելի վաղ Բրյուսելում հայտնել էր ԵՄ արտաքին քաղաքականության աղբյուրը։ Բացի դրանից՝ նախարարները կքննարկեն հարաբերությունները Կենտրոնական Ասիայի երկրների, Վենեսուելայի և Էրիթրեայի հետ. հայտնում է ՏԱՍՍ-ը։

Դեկտեմբերի 8-ին ԵՄ 27 երկրների մշտական ներկայացուցիչներն արդեն հավանություն են տվել «Վագների» դեմ պատժամիջոցների կիրառմանը։ Եվրամիության համար նման պատժամիջոցների անհրաժեշտության մասին քաղաքական որոշումը ԵՄ խորհուրդն ընդունել է նոյեմբերի 15-ին։ Խոսքը ԵՄ սև ցուցակը մի շարք ֆիզիկական և իրավաբանական անձանցով համալրելումասին է։ Նրանց բոլորին կարգելվի մուտք գործել ԵՄ և ԵՄ բանկային համակարգ։

Ցուցակը կհրապարակվի երեքշաբթի ԵՄ պաշտոնական ամսագրում։

Նախարարները մտադիր են նաև հաստատել Մալիի նկատմամբ պատժամիջոցների նոր ռեժիմը՝ ժողովրդավարությանն անցնելու քաղաքական գործընթացը արգելափակելու համար։

Ֆրանսիան Մալիի և «Վագների» դեմ պատժամիջոցների հիմնական «հովանավորն» է։ Աշնան սկզբից Փարիզը խոր մտահոգություն է հայտնել Մալիում իր դիրքերի կորստի կապակցությամբ, որը պայմանավորված է առաջին հերթին այդ երկրում ֆրանսիական հակաահաբեկչական ռազմական գործողության սահմանափակմամբ։ Միևնույն ժամանակ, Ֆրանսիայի արտգործնախարարն ու պաշտպանության նախարարը բազմիցս քննադատել են «Վագներ»-ի հնարավոր տեղակայումը Մալիում՝ նշելով, որ նրա գործունեությունը «անհամատեղելի» է ֆրանսիական ռազմական ներկայության շարունակման հետ։