Լիլիթ Մակունցը չի բացառում, որ կընդունեն Վահե Գրիգորյանի առաջարկը

Այս օրվա վերջում կամ վաղը կունենանք հստակ թեկնածու, այս պահին չեմ կարող ասել. սա եղավ խորհրդարանի մեծամասնության` «Իմ քայլը» խմբակցության ղեկավար Լիլիթ Մակունցի պատասխանը լրագրողների հարցին, թե պատրաստվո՞ւմ են մինչև ԱԺ  նստաշրջանը ԲԴԽ նոր թեկնածու առաջադրել:

 «Մեզ համար անչափ կարևոր են թե՛ պրոֆեսիոնալիզմը, թե՛ որակները, թե՛ այն չափանիշները, որոնց մասին արդեն խոսել եմ»,- նշեց նա:

Սահմանադրական դատարանի շուրջ ստեղծված վիճակին դառնալով` Մակունցն ասաց, որ «Իմ քայլը» դեռևս հստակ որոշում չունի դատարանի շուրջ ստեղծված իրավիճակի մասով:

«Չենք որոշել, թե ճանապարհային ինչ քարտեզով ենք շարժվելու: Ծանոթացել ենք Վահե Գրիգորյանի նամակին, բայց չենք շտապում լուծումներով կամ հանգուցալուծումներով հանդես գալ: Չեմ բացառում, որ կընդունենք Վահե Գրիգորյանի առաջարկը, չեմ բացառում նաև, որ ինքներս մեր լուծման տարբերակով հանդես գանք: Կարծում եմ՝ նման իրավիճակում շտապողականություն ցուցաբերելու իրավունք չունենք: Շտապել պետք է, բայց ոչ հապճեպ որոշումներ կայացնել»,- ասաց Մակունցն ու հավելեց`  հստակ դիրքորոշում չունեն նաև այն հարցի վերաբերյալ, թե արդյո՞ք ՍԴ-ում ճգնաժամ կա: