Գիտնականները հաստատել են, որ Օմիկրոնն ավելի վարակիչ է, քան Դելտան

Կորոնավիրուսի նոր՝ Օմիկրոն շտամը հիվանդության վաղ փուլում տարածվում է 4,2 անգամ ավելի արագ, քան Դելտա շտամը. գրում է Bloomberg-ը՝ վկայակոչելով ճապոնացի գիտնականների ուսումնասիրության արդյունքները։

Հետազոտության հեղինակ, Կիոտոյի համալսարանի պրոֆեսոր Հիրոշի Նիշիուրան վերլուծել է կորոնավիրուսի գենոմային տվյալները, որոնք ստացվել են մինչև նոյեմբերի 26-ը Հարավային Աֆրիկայի Գաուտենգ նահանգում՝ Օմիկրոն շտամի բռնկման էպիկենտրոնում:

«Օմիկրոն շտամն ավելի վարակիչ է և հաղթահարում է իմունիտետը, որը ձևավորվել է ինչպես բնական ճանապարհով, այնպես էլ պատվաստումների միջոցով»,- ասվում է պարբերականի հոդվածում:

Ներկայումս քիչ բան է հայտնի Օմիկրոնի շտամի դրսևորման առանձնահատկությունների մասին։ Հարավաֆրիկյան բժիշկներն ասում են, որ դրանով վարակվածները հիմնականում հեշտ են տանում հիվանդությունը և ունենում են գրիպի նման ախտանշաններ, ներառյալ՝ չոր հազը, ջերմությունը, գիշերային քրտնարտադրությունը և մարմնի ուժեղ ցավերը: