ՄԱԿ-ի գլխավոր քարտուղարը Պաղեստինին և Իսրայելին խաղաղ գոյակցության կոչ է անում

Պաղեստինցիների իրավունքների շարունակական խախտումները, իսրայելական բնակավայրերի ընդլայնման հետ մեկտեղ, կարող են խաթարել երկու պետությունների հիման վրա լուծման հեռանկարը։ Այս մասին հայտարարել է ՄԱԿ-ի գլխավոր քարտուղար Անտոնիո Գուտերեշը նոյեմբերի 29-ի՝ Պաղեստինի ժողովրդի հետ համերաշխության միջազգային օրվա կապակցությամբ իր ուղերձում. հայտնում է ՄԱԿ-ի մամուլի ծառայությունը։

«Ես կողմերին կոչ եմ անում խուսափել միակողմանի քայլերից, որոնք կխաթարեն միջազգային իրավունքի և ՄԱԿ-ի համապատասխան բանաձեւերի հիման վրա հակամարտության խաղաղ կարգավորման հնարավորությունները։ Ես նաև կոչ եմ անում կողմերին՝ կառուցողականորեն ներգրավվել Գազայի շրջափակումը դադարեցնելու և բոլոր պաղեստինցիների կենսապայմանները բարելավելու համար»,- ասել է Գուտերեշը:

Նա ողջունել է Իսրայելի և Պաղեստինի բարձրաստիճան պաշտոնյաների վերջին հանդիպումները, սակայն ընդգծել է խաղաղ գոյակցության հայեցակարգին հետամուտ լինելու անհրաժեշտությունը։