Արի այստեղ, «լայվի» հետեւում մի թաքնվիր. «Ազատագրական շարժումը» ներկայացրեց իր պահանջը

Հանրապետության հրապարակում հավաքված «Ազատագրական շարժում» նախաձեռնող խմբի հավաքի մասնակիցները երթ իրականացրեցին։ Ազգագրական երաժշտության ներքո Ամիրյան փողոցով քայլեցին դեպի Մաշտոցի պողոտա, հետո Սայաթ-Նովա փողոց։

Երթի ավարտին մասնակիցները կվերադառնան Հանրապետության հրապարակ։

«Այս ընթացքում Փաշինյանին ժամանակ ենք տալիս, որ գա մեր հարցերին պատասխանելու։ Եթե այստեղ չլինի, կհամարենք արհամարհանք մեր նկատմամբ, և սկսելու ենք վաղվանից մեր արհամարհանքը ցույց տալ։ 2018-ին, երբ փողոցներ էին փակում, բուհեր, ռադիոտուն մուտք գործեցին, դրա համար պատասխանատվություն չկրեցին, ի՞նչ է իրենք արտոնյալ են, մենք՝ ոչ, էտ գործիքները միայն իրե՞նց համար է, մենք էլ ենք օրինակ վերցնում իրենից»,- հայտարարեց «Զարթոնք» կուսակցության ղեկավար Արա Զոհրաբյանը։

«Հանուն այն զինվորի, որը կանգնած է սահմանին, դուրս եկեք փողոց։ Պահեք զիվորներին, համոզված եմ, որ որևէ մեկը չի ուզում նորից զոհ, դուրս եկեք փողոց»,- կոչ հղեց «5165» կուսակցության նախագահ Կարին Տոնոյանը։

Նախաձեռնության անդամները հայտարարեցին, որ վաղը 18։30-ին նորից նախատեսված է հավաք Հանրապետության հրապարակում։

Նշենք, որ մեդիափորձագետ Նաիրի Հոխիկյանի, փաստաբան Արա Զոհրաբյանի, նախկին պատգամավոր Սոֆյա Հովսեփյանի և Վազգեն Պետրոսյանի նախաձեռնած Ազատագրական շարժման իրազեկման ակցիան, որն այսօր առավոտից քայլերթով  անցավ գլխավոր բուհերի՝ ԵՊՀ-ի, Պոլիտեխնիկի, Ագրարային, Բժշկական, Տնտեսագիտական, Մանկավարժական համալսարանների մոտով, եզրափակվեց Հանրապետության հրապարակում  հանրահավաքով՝ հայտնում է Yerkir.am-ը։

Շարժմանը երեկվանից միացել են տարբեր հասարակական-քաղաքական գործիչներ և կազմակերպություններ: 

Հիշեցնենք, որ ավելի վաղ Շարժման հիմնադիրներից Նաիրի Հոխիկյանը տարածել էր մեկնարկած Ազատագրական շարժման նպատակը, որը ներկայացնում ենք ստորև. 

«Հայրենակիցներ, մեկնարկել է ազատագրական շարժումը, որի նպատակն է.

- կանխել սահմանագծման և սահմանազատման հակահայկական ծրագիրը, այդ թվում՝ պահանջելով հրապարակել ստորագրման ներկայացված փաստաթղթերը,

- թույլ չտալ միջանցք տրամադրել թշնամուն,

- պահանջել, որ Հայաստանի իշխանությունները լիարժեք զինեն առաջնագիծը և պաշտպանեն ՀՀ տարածքային ամբողջականությունը:

Մեր պայքարը հայկական պետականության պահպանման համար է։ Մեր երկրի անվտանգությունը ամեն մեկիս ձեռքում է' Սյունիքից մինչև Տավուշ, Շիրակից մինչև Արցախ»։