Անտառ հրկիզելու կասկածանքով՝ Թուրքիայում 7 ռուս զբոսաշրջիկների են ձերբակալել

Թուրքական Անթալիայում, անտառը հրկիզելու կասկածանքով, ռուսաստանցի յոթ զբոսաշրջիկների են ձերբակալել, որոնք քայլում էին Լիկիական արահետով` զբոսաշրջային երթուղիով։ ՌԴ քաղաքացիների կալանավորման մասին РИА Новости-ին հայտնել են ՌԴ գլխավոր հյուպատոսությունում. գրում է «Եվրոպեյսկայա պրավդան»։

Միջադեպը տեղի է ունեցել շաբաթ օրը Չաղլարջա շրջանում, երբ արշավականները գնում էին հայտնի՝ Լիկիայի արահետով:

«Տեղական օրենսդրության համաձայն՝ իրավապահ մարմինները, թարգմանչի ներգրավմամբ, արձանագրություն են կազմել գործով կասկածյալների և վկաների ցուցմունքների վերաբերյալ»,- ասել է ՌԴ հյուպատոսության ներկայացուցիչը։

Ռուսներն ասել են, որ արահետի մոտ հրդեհ են տեսել ու փորձել են մարել։ Զբոսաշրջիկներից մեկն «Ինստագրամ»-ում գրել է, որ զանգահարել են 911, իսկ ճանապարհին տեղի բնակիչները ձերբակալել են և կանչել ժանդարմներին։

Այս ամառ Թուրքիայի հարավի 30 նահանգներում խոշոր անտառային հրդեհներ են գրանցվել: Կլիմայական պատճառների հետ մեկտեղ իշխանությունները դիտարկում են դիտավորյալ հրկիզման վարկածը։