Քերոլայն Քոքսը շնորհակալական նամակ է հղել «Հայաստան» դաշինքին

Մեծ Բրիտանիայի Լորդերի պալատի անդամ և նախկին փոխխոսնակ,  իրավապաշտպան, բարոնուհի Քերոլայն Քոքսը նամակ է ուղարկել ՀՀ ԱԺ «Հայաստան» խմբակցության պատգամավոր Արթուր Խաչատրյանին, որում շնորհակալություն է հայտնել դաշինքին՝ իր ղեկավարած բարեգործական հիմնադրամին նվիրատվություն անելու համար:

«Հարգելի Արթուր (եթե կարող եմ): 

Հենց նոր ստացա հրաշալի լուր, որ ՀՀ Ազգային ժողովի «Հայաստան» խմբակցության բոլոր անդամները 10,740,000 դրամ (16,500 եվրո) են նվիրաբերել Լեդի Քոքսի վերականգնողական կենտրոնին:

Ինձ համար դժվար է գտնել երախտագիտության և գնահատանքի համապատասխան խոսքեր: Ես և իմ գործընկերները խորապես շնորհակալ ենք այս առատաձեռն նվիրատվության համար, որն, անշուշտ, հույս ու լավատեսություն կբերի հիվանդներին և վերականգնողական կենտրոնի աշխատակիցներին: 

HART-ի գործընկեր Վարդան Թադևոսյանը պատերազմից անմիջապես հետո քաջաբար վերադարձել է Ստեփանակերտի կենտրոն իր գործընկերներից շատերի հետ: Նրանք այժմ ծայրահեղ ճնշման տակ են աշխատում՝ իրենց մշտական հիվանդներին և 44-օրյա պատերազմում վիրավորված մեծ թվով զինվորներին բուժում ապահովելու համար:  Հետևաբար, այս փայլուն նվերը և այն ամենը, ինչ այն ներկայացնում է, հսկայական հարմարավետություն կբերի անձնակազմին և հիվանդներին: 

Նաև շատ շնորհակալ եմ ձեր ժողովրդին մեր աջակցության մասին բարի խոսքերի համար: Ինչպես միշտ ասում եմ, մենք պետք է շնորհակալություն հայտնենք ձեզ՝ հայերիդ, որ մեզ համար հավատարմության և ազատության առաջնագիծը պահեցիք մեծ զոհողությունների գնով:

Մենք գրեթե ավարտել ենք մեր այցի զեկույցը և պատճենը կուղարկենք ձեզ, երբ այն ավարտին հասցնենք՝ ինչքան հնարավոր է շուտ: Միևնույն ժամանակ, մենք Humanitarian Aid Relief Trust-ում (HART) մեծապես ակնկալում ենք ապագա համագործակցություն:

Կրկին շնորհակալությամբ և ջերմ ողջույններով HART թիմի կողմից՝

Քերոլայն բարոնուհի Քոքս, հիմնադիր նախագահ»: