Ադրբեջանը Ռուսաստանից նոր զենք գնելու հայտ է ներկայացրել

Ադրբեջանի նախագահ Իլհամ Ալիևը հայտարարել է, որ Ադրբեջանն արդեն դիմումներ է ներկայացրել Ռուսաստանին՝ նոր տեսակի զենքի և ռազմական տեխնիկայի ձեռքբերման համար:

«Բնականաբար, այժմ մենք դիտարկում ենք նոր սարքավորումները։ Տեխնիկական խմբերն ուսումնասիրում են նոր հնարավորություններ, մենք արդեն ներկայացրել ենք որոշ հայտեր, ուստի Ռուսաստանի հետ այս ուղղությամբ համագործակցությունը նույնպես կզարգանա»,- ասել է Ադրբեջանի նախագահը  Национальная оборона ամսագրին տված հարցազրույցում: 

Նա ընդգծել է, որ շատ վստահելի հարաբերություններ ունի Ռուսաստանի նախագահ Վլադիմիր Պուտինի հետ:

«Եվ, իհարկե,  փոխադարձ հարգանքի խոր զգացում: Մեր նպատակներն ամբողջությամբ համընկնում են»,- ասել է Ալիևը:

Նրա խոսքով՝ Ռուսաստանն ու Ադրբեջանը «լավ աշխատանք» են կատարում բոլոր ոլորտներում, այդ թվում՝ ռազմատեխնիկական համագործակցության: Ալիևը նաև վստահություն է հայտնել, որ ապագայում երկու երկրների համագործակցությունը «կշարունակի աճել»: