«Գազպրոմը» հայտարարել է Թուրքիային գազի մատակարարման ռեկորդային ցուցանիշի մասին

Ռուսական գազի մատակարարումները Թուրքիա ռեկորդային բարձր են 2021 թվականի սկզբից: Այս մասին սեպտեմբերի 20-ին հայտնել է «Գազպրոմ»-ի մամուլի ծառայությունը:

«2021 թվականի հունվարի 1-ից սեպտեմբերի 19-ը «Գազպրոմը» Թուրքիային մատակարարել է 20,3 մլրդ խմ գազ: Սա պատմականորեն ռեկորդային ծավալ է այս ժամանակահատվածի համար և 153%-ով (12,3 մլրդ խմ) ավելի, քան 2020 թվականին (8 մլրդ խմ)», - հաղորդում է ընկերության թելեգրամյան ալիքը:

Գազի ոլորտում երկու երկրների համագործակցությունն այսօր քննարկվել է «Գազպրոմի» գործադիր տնօրեն Ալեքսեյ Միլերի և Թուրքիայի էներգետիկայի և բնական պաշարների նախարար Ֆաթիհ Դոնմեզի հանդիպման ժամանակ:

Նշվում է, որ կողմերը «բարձր են գնահատել «Կապույտ հոսք» և «Թուրքական հոսք» գազատարների աշխատանքը, որոնք «հուսալիորեն Սև ծովով ռուսական գազը տեղափոխում են սպառողներին»: