Շոյգուն ասել է, որ Ուկրաինան Ռուսաստանի համար սպառնալիք չէ

Ուկրաինան սպառնալիք չէ Ռուսաստանի համար, իսկ ուկրաինացիները եղբայրական ժողովուրդ են. հայտարարել է ՌԴ պաշտպանության նախարար Սերգեյ Շոյգուն:

«Ես չէի խոսի Ուկրաինայի մասին՝ որպես սպառնալիքի: Ես համարում եմ, որ Ուկրաինան և ուկրաինացի ժողովուրդը եղբայրական մարդիկ են: Նրանք միայն մեր հարևանները չեն, մենք մեկ ժողովուրդ ենք: Այստեղ ես նույնիսկ չեմ ուզում վիճել և անդրադառնալ այս թեմային»,- ասել է նա Soloviev Live յութուբյան ալիքին տված հարցազրույցում։

Հունիսի սկզբին Շոյգուն հայտարարել էր, որ Եվրոպայում ռազմական դիմակայության աճի միտում է նկատվում: Նա մատնանշել էր ՆԱՏՕ-ի կողմից բարձր պատրաստության խմբերի կուտակումը, որոնք ուղիներ են մշակում զորքերի օպերատիվ տեղափոխման համար Ռուսաստանի և Բելառուսի սահմաններին: