Խաղաղութեան դրական ազդակներ Թուրքիայի՞ց...

Երէկ Հայաստանի կառավարութեան նիստում Ն. Փաշինեանը վերահաստատելով հէնց օրերս խորհրդարանում ներկայացրած իր հնգամեայ ծրագրում մատնանշած «Խաղաղութեան դարաշրջան սկսելու» ականջահաճոյ թէզը, առանց որեւիցէ պատմական ու աշխարհագրաքաղաքական ժամանակակից-անմիջական իրողութիւնների մեկնաբանման, յայտարարեց, որ «Տարածաշրջանային խաղաղութեան թեմայով որոշակի հրապարակային դրական ազդակներ կան Թուրքիայի կողմից…» ու յաւելեց. «Մենք այդ ազդակները կը գնահատենք եւ դրական ազդակներին դրական ազդակներով կը պատասխանենք»…:

Խաղաղութեան դրական ազդակներ Թուրքիայի՞ց…

Կա՞յ նման ապացոյց, իրողութիւն…

Այո, կա՛յ, իսկ նմանօրինակ ազդակների հասցէատէրերն են լոկ՝ Ադրբեջան կոչւող շինծու պետութիւնը, Պակիստանի նման ԴԱԷՇ-ածին երկիրը ու մէկ էլ՝ Կիպրոսի Հանրապետութեան օկուպացրած «թուրքական համայնքը»…:

Հիմա դիտարկենք Ն. Փաշինեանի մատնանշած տարածաշրջանի ու դեռ յարակից տարածաշրջաններում «թուրքական խաղաղութեան դրական ազդակներին», զորօրինակ՝ Սիրիայում, Իրաքում ու այդ երկրից անբաժան քրդական ինքնավար շրջանում, Աֆրիկեան տարածաշրջանի Լիբիայում ու նմանատիպ «խաղաղ ազդակները»՝ Եգիպտոսի նկատմամբ ու դեռեւս միջերկրածովային տարածաշրջանում ու Էգէյեան ծովում՝ Յունաստանի հողային ամբողջականութեան հաշւին…:

Դեռ զանց առած՝ թուրքական միեւնոյն «խաղաղասիրական ազդակների» գնահատականը նոյնինքն սեփական երկրում բնակւող միլիոնաւոր քրդական ժողովուրդների ու այլ փոքրամասնութիւնների առնչութեամբ: Եւ կարեւորը՝ զանց առած թուրքական բազմադարեայ եւ առաւել եւս մինչ Հայոց Ցեղասպանութեան ու յետցեղասպանական «խաղաղութեան ազդակները»…

Ի դէպ՝ Թուրքիային խաղաղութեան աղաւնու կերպաւորման նենգամիտ թէզի քարոզչամեքենան, յանձնիս պետրոսղազարեանական Հ1-ի, թերեւս կարճաժամկէտում ի զօրու լինի շարունակել մոլորեցնել Շուռնուխի, Որոտանի, Առաջաձորի եւ միւս գիւղաբնակ համայնքների մշտապէս խաղաղասէր ու միամիտ ժողովրդականութեանը, բայց երբեք՝ Հայրենիքի անվտանգութեամբ ու ինքնիշխան պետականութեամբ մտահոգւող Հայաստանի ու Արցախի զգօն հասարակայնութեանը, որոնց անբեկանելիօրէն հոգով ու սրտով միացած է արտերկիր-Սփիւռքը, յատկապէս երբ հայրենական վտանգի սպառնալիքը ազդարարւած է ցեղասպան ու հայատեաց թուրքա-ադրբեջանական դահիճների կողմից…:

Շահան Գանտահարեան